Alibeaj: Tahirin e heton Prokuroria shqiptare
Paloka: Letra të tilla morën dhe të inkriminuar të tjerë të PS
Nënkryetari i Grupit Parlamentar të PD, Enkelejd Alibeaj, ka deklaruar se dokumenti që pretendon pafajësi Tahiri, nuk ka asnjë vlerë ligjore. Në një deklaratë për mediat, Alibeaj deklaroi se dokumenti i Prokurorisë së Katanias nuk ia heq përgjegjësitë Tahirit, pasi institucioni i drejtësisë italiane nuk ka për detyrë të procedojë ministrin në Tiranë. “Letra që nxori Saimir Tahiri mund të tundet për militantët e oborrit, por për askënd tjetër. Prokuroria e Katanias ka arrestuar Moisi Habilajn dhe kërkon anëtarët e tjerë të bandës sepse ata janë kapur duke e kryer aktivitetin kriminal në territorin e tyre, në Itali. Prokuroria e Katanias nuk mund dhe nuk e ka për detyrë të procedojë ministrin në Tiranë, që mbështet, lehtëson dhe i hap rrugën bandës në trafikun e drogës. Kjo është detyrë e Prokurorisë shqiptare”, deklaroi Alibeaj. Sipas deputetit demokrat, dosja me 1800 faqe tregon përfshirjen e ishministrit, i cili ka përfituar me miliona euro nga lidhja me Habilajt. “Aktakuza e antimafias italiane për Tahirin janë 1800 faqe, prova, dëshmi dhe fakte të drejtësisë italiane që tregojnë përfshirjen direkte të Tahirit dhe përfitimet e tij në miliona euro nga trafiku i tonelatave me drogë. Çdo qytetar shqiptar do të ishte në burg me këto prova. Por Saimir Tahiri jo, sepse ka imunitet dhe sepse e mbron Edi Rama. Ndërkohë që ndaloi drejtësinë të bënte punën e saj, Edi Rama i dha kohën e duhur Tahirit të pastronte shtëpinë dhe të zhdukte provat që e lidhin me bandën e trafikut të drogës”, u shpreh Alibeaj. Edhe nënkryetari i PD, Edi Paloka i ka kujtuar Tahirit se letra të tilla në institucionet e drejtësisë italiane kanë marrë edhe ish- funksionarë të lartë të inkriminuarve të PS-së, por sot nuk janë në detyrë. Paloka thekson se ish- funksionarë të lartë të PSsë, që morën dokumente nga institucionet e drejtësisë italiane jo vetëm që nuk janë nën hetim, por se nuk kanë qenë të dënuar dhe sërish dolën të inkriminuar. “Nga këto letrat që po tund Tahiri, morën dhe Roshi i Kavajës dhe një pjesë e të inkriminuarve të tjerë të Ramës, madje edhe kur kishin qenë të dënuar e jo thjesht të hetuar”, thekson Paloka. Nënkryetari i PD shprehet se Tahiri duhet të sqarohet vetë, por edhe të qartësojë publikun përse Rama nuk e emëroi sërish ministër dhe përse e përjashtoi nga PS. “Ky Tahir Habilaj duhet të pyesë Ramën ( se kështu sqarohet dhe publiku); Pse e largoi nga ministër? Pse, me gjithë se ishte ‘ ministri me i suksesshëm’ dhe me gjithë ‘ suksesin’ në zgjedhje, nuk e vuri më në listën e ministrave? Pse e përjashtoi nga grupi parlamentar? Rama di ndonjë gjë më shumë apo nuk di asgjë për këtë çështje? Shumë shpejt, shqiptarët do marrin më shumë se këto përgjigje, pavarësisht se ka apo jo vullnet Rama ta bëjë një gjë të tillë”, deklaroi Paloka.