Raportet për Tahirin, PS: Të mos arrestohet
PD pro: Ish- ministri, miku i Ramës, po tremb dëshmitarët
Parlamenti do të votojë sot për kërkesën e Prokurorisë së Krimeve të Rënda, nëse do të lejojë apo jo arrestimin e ishministrit të Brendshëm, Saimir Tahiri. Partia Socialiste do të votojë sot raportin e saj, në të cilin është e mendimit se akuzat ndaj Tahirit janë të pafaktuara dhe me sfond politik. Por socialistët kanë bërë disa lëshime për prokurorinë, që të hetojë Tahirin, t’i kontrollojë banesën dhe pasuritë, por në asnjë rast të mos e arrestojë atë. Në raportin e PS- së thuhet se: “Mungesa e provave, nxitimi i organit të akuzës për të kërkuar dhënien e autorizimit për arrestimin ose heqjen e lirisë së deputeti Saimir Tahiri, dy ditë sa po ka regjistruar procedimin penal dhe emrin e tij në regjistrin e çështjeve penale, krijon bindjen se në këtë stad të hetimeve që ka kryer Prokuroria, kërkesa ka sfond politik”, thuhet në argumentin e PS- së. Për socialistët, kërkesa e Prokurorisë duhet të pranohet pjesërisht: “Dhënie e autorizimit për ndalimin e daljes jashtë shtetit, detyrimin për t’u paraqitur në Policinë Gjyqësore, ndalimin dhe detyrimin për qëndrimin në një vend të caktuar, si masë shtrënguese si heqje lirie, si masa shtrënguese të heqjes së lirisë”. Por në raportin e demokratëve, Saimir Tahiri duhet t’i nënshtrohet arrestit nga Prokuroria e Krimeve të Rënda, pasi mund të prishë provat. “Tahiri nuk është një ish- ministër apo deputet i opozitës. Ai është ish- ministër i qeverisë, deputet i Edi Ramës dhe mik i ngushtë i Kryeministrit. Ai si ish- ministër, jo vetëm që dyshohet se ka ndihmuar organizatën kriminale dhe ka marrë shpërblime personale, por duke i vënë strukturën e shtetit në shërbim të organizatës kriminale, ai ka siguruar para zgjedhjeve”, thekson raporti i PD- së. Më tej specifikohet se, me lënien jashtë të Tahirit nën mbrojtje: “Provat mund të dëmtohen, radarët, dëshmitarët që shohin Ramën në krah të Tahirit heshtin bashkëpunëtorët e drejtësisë brenda dhe jashtë Shqipërisë. Pra ka një rrezik real që bëhet me qëllim për t’i shërbyer Tahirit dhe bandës kriminale që është në hetim në Shqipëri dhe Itali”, thekson raporti i PD- së.