“Pse po ndryshojnë taksat e tatimet”

Ministri tregon paketën fiskale: Si do e ndihmojë biznesin

Ministri i Financave, Arben Ahmetaj, dje në takimin me biznesin e Dhomës Amerikane të Tregtisë, prezantoi paketën fiskale të vitit të ardhshëm. Ministri Ahmetaj shpjegoi arsyet e ndryshimet të taksës së pronës, e cila, pas 1 janarit, do të llogaritet mbi çmimin e shtëpive sipas vlerës së tregut. “Do të jetë një taksë në përqindje, e cila aplikohet mbi vlerën e tregut të ndërtesës. Për hir të së vërtetesës, taksa e pronës është taksa më e dështuar në këto 27 vjet. Besoj se tani ne kemi kapur në themel taksën e pronës, për ta kthyer në një instrument shumë të mirë fiskalizimi dhe formalizimi, por edhe të ardhurash për pushtetin vendor. Sipërmarrja përfiton ulje të ngarkesës, në krahasim me atë që kanë qenë taksë fikse, 400 lekë/ m2”, shpjegoi Ahmetaj. Pas taksës së pronës, ministri Ahmetaj prezantoi edhe paketën favorizuese për turizmin. Ministri u shpreh se, me paketën e re, TVSH- ja 6 për qind e turizmit do të shtrihet te të gjitha hotelet me 4 dhe 5 yje, që ndërtohen rishtazi për të gjitha shërbimet që ofrojnë. “Te projektligji për TVSh- në kemi ndërmarrë një hap të guximshëm të mbështetjes së sektorit të turizmit. Ofrojmë një paketë për turizmin, ku prekim TVSH- në, prekim taksat kombëtare dhe tatim fitimin. Te TVSH- ja, afrojmë me 6 për qind për hotelet me 5 yje që do të ndërtohen rishtazi, pra 6 për qind TVSH për të gjitha shërbimet brenda mureve të strukturës akomoduese me 5 yje, që janë “brand name”. Me vendim të Këshillit të Ministrave, do t’i referohemi listës së organizatës botërore të turizmit, se cilat janë “brand name” kryesore të hoteleve me 5 yje dhe ta huazojmë atë listë për ta përdorur për avantazh fiskal për ndërtimin e një hoteli me 5 yje. Para 9 muajsh, TVSH ka qenë 6 për qind për hotelet “me shtrat dhe mëngjes”, ndërsa tani e zgjerojmë TVSH 6 për qind për të gjitha shërbimet brenda strukturës akomoduese. Ministri i Financave, Ahmetaj, tha se me paketën e re fiskale, sektorit të turizmit i ofrohen të tjera lehtësi fiskale. “Projektligji për tatimin mbi fitimin synon lehtësimin e sektorit të turizmit, duke e ulur normën tatimore në zero për qind për 10 vitet e para për strukturat akomoduese, hotele me 4 yje dhe 5 yje, me të njëjtën listë brendesh të certifikuara nga organizata botërore e tur- izmit. Kemi edhe përjashtimin nga taksa e ndikimit në infrastrukturë të investimeve për strukturat akomoduese me 5 yje, në logjikën e paketës për mbështetjen e turizmit. Çka do të thotë që, një ‘ brand name’ që ndërton një hotel me 5 yje në bashkëpunim apo me jo me kompanitë shqiptare, përjashtohet nga taksa e infrastrukturës ku në shumë zonë është 4 dhe 8 për qind. Kjo është një lehtësi shumë e madhe për investitorët në turizëm dhe një përpjekje serioze për të tërhequr investitorë të hoteleve me 5 yje”, shpjegoi ministri Ahmetaj.