Rosemarie Trockel shkrin kufijtë, ekspozitë në Tiranë
Një përzgjedhje prej 60 veprash, ku prezantohet koncepti i saj mbi artin dhe i dallimeve mes grave e burrave
Me siguri, asaj nuk i pëlqejnë as kufijtë dhe as kufizimet. Linjat e paqarta janë preferenca e saj, madje një nga pikat më të forta të punëve të saj janë pikërisht ato boshllëqe, ku çdo vizitor mund të fusë eksperiencën e vet.
Asnjëherë, asnjë gjë nuk është as e qartë dhe as ashtu si duket. Rosemarie Trockel i vë njerëzit së pari të shohin dhe pastaj të mendojnë, dhe interpretimi është gjithnjë personal dhe i vlefshëm. Dhe, në Galerinë Kombëtare të Arteve u hap ekspozita e artistes gjermane Rosemarie Trockel. Një nga emrat më të njohur të artit bashkëkohor europian. E pakufizuar në teknika dhe materiale, aq sa e tërhequr në daljet e saj publike dhe mediatike. Ekspozita e hapur në Tiranë është kuruar nga është kuruar nga An Paenhuysen dhe përmban një përzgjedhje punësh si vizatime, fotografi e video- instalacione. Përgjatë gjithë karrierës së saj artistike, veprat e Trockel janë shfaqur si një kundërvënie ndaj dominimit mashkullor edhe në sferën artistike, si një pasqyrim i pikëpamjeve të saj si një përfaqësuese e botës femërore, e megjithatë, kuratorja e ekspozitës, nxiton të theksojë se Trockel nuk është feministe, ajo nuk do të donte ta përqasnin me asnjë lloj rryme aq më tepër "feministe", pasi, sipas Paenhuysen, kjo nuk ka një konota- cion pozitiv në Europë. Drejtori i Galerisë Kombëtare të Arteve, Artan Shabani, bëri një prezantim të ekspozitës dhe të karrierës së autores. "Ekspozita ka rreth 60 punime dhe i mundëson publikut shqiptar, për herë të parë, një njohje me veprat e kësaj artisteje shumëdimensionale, duke nisur nga vizatimet, fotografitë, tablotë e famshme me thurje në lesh e deri tek" Malmaschine" ( Makina Piktorike), e cila është një nga veprat e famshme të Trockel. Ky instalacion, që gjendet në hyrje të ekspozitës, është një shpikje nga ana e artistes, e cila përdor në vend të furçës së penelave flokët e artisteve të famshme bashkëkohore ( miq të saj) si Frank Stella, Richard Serra, Gerhard Richter, Mike Kelley, etj., duke hedhur kështu një pyetje shumë interesante: cili është autori i veprës", tha Shabani, duke shtuar po ashtu rëndësinë që ka kjo ekspozitë në bashkëpunimin dhe shkëmbimin artistik me një vend si Gjermania, çka u mbështet edhe nga ambasadorja gjermane në Tiranë, znj. Susanne Schütz. Ekspozita është pjesë e stinës së aktiviteteve "Tetori Gjerman" dhe u mundësua në bashkëpunim me Ambasadën Gjermane në Tiranë dhe Institutin për Marrëdhëniet me Jashtë ( IFA). Në ceremoninë e hapjes merrte pjesë Presidenti i Republikës, Ilir Meta dhe ministraj e Kulturës, Mirela Kumbaro.
EKSPOZITA
Kuratorja An Paenhuysen preferoi të zhvillonte një bisedë rreth veprës së Trockel, duke vizituar ekspozitën e hapur në sallën e madhe të katit të parë. "Shëtitja" nis me një seri fotografish bardhë e zi, përmes së cilave kuratorja shpjegoi edhe filozofinë krijuese të Trockel. Ajo shpjegoi se artistes i interesojnë më së shumti linjat e paqarta, imazhet e turbullta, që lënë vend për interpretime. Sipas saj, Trockel e udhëheq vizitorin më së pari te ndjesorja pastaj te mendorja. Një seri vizatimesh e thekson edhe më tepër konceptin e saj mbi shkrirjen e kufijve. Ajo vizaton njërin mbi tjetrin imazhe burrash e grash, është Bertold Brecht- mendja dhe Brigite Bardot- bukuria. Duke vendosur një mbi një imazhet e tyre, krijohet një imazh i dyzuar. Nuk ka vetëm burra të zgjuar dhe gra të bukura. Këto të dyja mund të shkojnë fare mirë së bashku. Në të njëjtën linjë shkon edhe një tjetër seri vizatimesh, ku paraqiten burra duke fjetur. Edhe në këtë proces, duke përdorur ironinë, ajo zgjedh t'i vendosë ata në pozicione mashkullore, si mbi një makinë, me një armë nën divan, etj. Në një kombinim fotografish dhe vizatimesh, ajo vendos portretin një gruaje me sy të nxirë, si të ishte viktimë e dhunës në familje dhe pranë saj vizatime kërpudhash. Kuratorja thotë se, jo rrallë herë, ajo bën kombinime të tilla të rastësishme, pa një lidhje shkak- pasojë me njëratjetrën, punë që janë realizuar në vite të ndryshme, pa dashur të përcjellë një ide apo mesazh të caktuar, por për ta lënë vizitorin ta vendosë vetë lidhjen. Interesante paraqitet edhe makineria e saj e pikturave me furça të krijuara me flokë njerëzish. Janë flokë të miqve të saj artistë, që i përdor për të pikturuar mbi telajo. Dhe tashmë është e vështirë të dallosh se shenjat e kujt janë mbi telajo dhe nëse ato janë si rezultat i punës së autores apo flokëve të artistëve...