Shqipëria dhe Kosova, kalendar aktivitetesh shkencore
Shqipëria dhe Kosova, një kalendar të përbashkët aktivitetesh shkencore për vitet 2018- 2020. Akademia e Shkencave të Shqipërisë, nënshkroi dje protokollin dyvjeçar të aktiviteteve shkencore ( 2018- 2020) me Akademinë e Shkencave dhe të Arteve të Kosovës. Protokolli u nënshkrua nga sekretarët shkencorë përkatës të Akademive: akademik Isuf Krasniqi ( ASHAK) dhe akademik Vasil S. Tole ( ASHSH). Një vend të veçantë në protokoll zënë aktivitetet për vitin 2018, shpallur si "Viti i Skënderbeut" nga Këshilli i Ministrave të Shqipërisë. Kalendari përmban një sërë aktivitetesh si konferenca shkencore, promovime librash, ekspozita, dixhitalizime, shkëmbime, etj. Disa nga konferencat më të rëndësishme lidhen me ngjarje të mëdha në historinë dhe kulturën shqiptare si figura e Skënderbeut, Lidhja e Prizrenit, Kongresi i Manastirit, etj. Disa nga konferencat që do të zhvillohen gjatë këtij dyvjeçari në Tiranë, Prishtinë, Shkup e Prizren, janë "Gjergj Kastrioti Skënderbeu, figurë e shekujve të humanizmit europian"; "140- vjetori i Lidhjes Shqiptare të Prizrenit"; "100- vjetori i Komitetit "Mbrojtja Kombëtare e Kosovës""; "110vjetori i Kongresit të Manastir- it"; "Romani shqiptar që nga fillimi i shekullit XXI"; "Për epistemologjinë e shkencave albanologjike sot"; "Studimi i ndryshimeve mjedisore, me përdorimin e imazheve satelitore në një segment të zonës ndërkufitare Shqipëri- Kosovë"; "Parandalimi i risqeve gjeologjike në planifikimin dhe zbatimin e zhvillimit urban në Shqipëri dhe Kosovë", etj., si dhe aktivitete të tjera si katalogimi online i fondeve albanologjike: bibliografitë online të kërkuesve shkencorë; përurim dhe zgjerim i procesit të krijimit të sistemit bibliografik online të kërkuesve shkencorë shqiptarë; shkëmbime reciproke të botimeve, të periodikëve dhe botimeve shkencore; veprimtari shkencore e përuruese në fushën e arteve; koncert me vepra të akademik Rauf Dhomit; ekspozitë personale e anëtarit korresp. të ASHAK Luan Mulliqi; koncert me vepra të akademikëve dhe kompozitorëve ? esk Zadeja, Tish Daija etj. Mësohet se për të ndjekur ecurinë e realizimit të veprimtarive të parashikuara në këtë Protokoll, përfaqësues të dy palëve do të takohen të paktën një herë në vit.