Spanja, gati të përdorë edhe forcën në Katalonjë
Zyrtarët spanjollë u përgjigjen thirrjeve katalanase për trazira
Spanja është e përgatitur për të përdorur forcën kundër protestuesve katalanas, të cilët refuzojnë drejtimin e rajonit nga Madridi.
Kështu ka paralajmëruar një ministër në Kabinetin spanjoll, ndërkohë që qeveria e Kryeministrit Mariano Rajoy po përgatitet për të ngrirë jetën financiare të Katalonjës. Inigo Mendez de Vigo, zëdhënësi i qeverisë spanjolle dhe Ministër i Arsimit, tha se Policia katalanase do të përdoret për të ndaluar protestat që kërcënojnë rendin publik, pavarësisht se zyrtarët rajonalë kërkojnë “mosbindje masive civile”. Spanja është gjithashtu e gatshme të shkurtojë të ardhurat tatimore të qeveriSë katalanase nga të gjitha burimet, duke i privuar zyrtarët të marrin pagat dhe të sigurojnë mjetet për të financuar çdo fushatë separatiste. Mendez de Vigo tha se Spanja do të sigurojë që ligji të respektohet në Katalonja. “Asnjë qeveri nuk dëshiron ndonjë akt dhune, por qeveria duhet të sigurojë që ligji të respektohet, dhe nëse ka njerëz në anën tjetër që nuk duan t’i binden ligjit, atëherë, përmes Mossos d’Esquadra [ Policisë katalanase], ne do të duhet të rivendosim ligjin”, tha ai për “The Times”. Zyrtari 61vjeçar tha se qeveria rajonale nuk do të zëvendësohet menjëherë, por ata që nuk respektuan ligjin, do të pushohen nga puna. “Qeveria nuk po pezullon autonominë. Ajo që po bëjmë është rivendosja e autonomisë. Ata që drejtojnë ‘ Mossos d’Esquadra’ do të zëvendësohen tani nga Ministria e Brendshme”, tha ai. Shefi i çështjeve të Jashtme të Katalonjës, Raul Romeva, tha për radion BBC, të hënën, se nëpunësit civilë, përfshirë edhe oficerët e Policisë, do të ndiqnin udhëzimet nga udhëheqësit lokale, në vend të Madridit. Mosbindja civile u mbështet gjithashtu nga partia e ekstremit të majtë CUP, një mbështetje e rëndësishme për qeverinë e pakicës pro- pavarësisë së Katalonjës në Parlamentin rajonal, që i quajti veprimet e Madridit një agresion ndaj të gjithë katalanasve. Ndërkohë, Spanja përgatiti të hënën kalimin mbi burimin e fundit të shquar të autoritetit rajonal të të ardhurave, taksat mbi pasurinë e trashëguar, për shembull, ose tarifat e regjistrimit në universitet. Në fund të muajit të kaluar, ekzistonte frika që 170,000 zyrtarë publikë katalanas nuk mund të paguheshin pasi Generalitat ( qeveria katalanase) refuzoi t’u ofrojë autoriteteve qendrore një regjistër të plotë të punonjësve. Një marrëveshje u arrit në minutën e fundit dhe secili mori pagën. Nëse Senati spanjoll voton për të shpërndarë qeverinë katalanase, Madridi do të ketë qasje të drejtpërdrejtë në regjistrat e personelit dhe pagesat duhet të vazhdojnë pa probleme. Por qeveria qendrore ka thënë se do të ndalojë dhënien e pagave për udhëheqësit separatistë, me kryetarin katalanas Carles Puigdemont që kryeson listën.