Procredit Bank DIREKT, platforma e re për klientët
Albumi "OPERA ATJON" ka dalë në qarkullim me rastin e 22- vjetorit të të riut
Ëndrrat plot ngjyra të Atjon Zhitit vlerësohen në Paris. Albumi, "OPERA ATJON", i cili doli në qarkullim në ditëlindjen e 22- të të Atjonit, po merr vlerësime edhe në Itali, Francë, Austri etj.
Këto ditë, në Muzeun e Luvrit në Paris, u hap Ekspozita Ndërkombëtare e Arteve Kontemporane. Fondacioni Ndërkombëtar Artistik "Artcom Expo International", që promovon dhe mbështet artistë nga vende të ndryshme të botës, kishte ftuar për të katërtin vit radhazi piktorin shqiptar me banim në Itali, Gjergj Kola, me të cilin fondacioni bashkëpunon prej kohësh. Tabloja sugjestionuese e tij, "The Kiss", mori vlerësime të shumta dhe u nderua me Medaljen e Krijimtarisë. Në këtë edicion piktori Gjergj Kola paraqiti dhe një piktor të ri, bashkatdhetarin Atjon Zhiti. "Krijimtaria e tij e përmbledhur në albumin ' OPERA ATJON', përgatitur mjeshtërisht nga piktori dhe kritiku i artit Gëzim Tafa, shpalos një krijimtari të çiltër artistike, plot fantazi, ngjyra e nuanca të freskëta, të sistemuara me estetikë dhe nivel të lartë profesional", u shpreh Kola. Albumi përmbledh një ëndërr, sa fëmijërore, po aq dhe universale, një realitet dëshirash, skica, vizatime e dritë, të shoqëruara me dy ese, kritika artistike nga dy profesionistë, si dhe punime kushtuar Atjonit nga piktorë të njohur, që nga postkubisti Ibrahim Kodra e deri tek impresionisti Gjergj Kola, i cili me elegancë ka arritur të kapë buzëqeshjen engjëllore të Atjonit. Gjashtë piktura të Gjergj Kolës për Atjonin u vunë dhe në ekspozitën vetjake në galerinë "Espace" në Paris. Bordi drejtues i këtij fondacioni, presidenti Hans Salbu dhe baronesha Jiselda Salbu, i dhanë "Medaljen e KUJTIMIT" artistit të ri Atjon Zhiti, në shenjë nderimi dhe adhurimi për nivelin e shkëlqyer artistik, të paraqitura me cilësi në këtë album, bagazh estetik i formuar nga një përvojë e veçantë, që shijohen dhe pranë veprave e kryeveprave në galeritë dhe muzetë e famshëm të Europës. Gjatë kësaj kohe, piktori Gjergj Kola ishte i ftuar edhe nga "Hypatija Festival" në Napoli, Itali, ku ai bashkëbisedoi virtualisht që nga Luvri me president- en e këtij festivali kulturor- shkencor, të mbështetur nga UNESCO. Piktorit iu kërkua të flasë për tematikën dhe mesazhin e tablosë së tij "The Kiss", të punës së tij në përgjithësi, si dhe të prezantojë albumin "OPERA ATJON", ku të pranishmëve në ekranin e madh u shfaqeshin fragmente dhe detaje nga vepra rinore e Atjon Zhitit. Të dy këta emra, Gjergj Kola dhe Atjon Zhiti, janë të lidhur me Italinë, por dhe me Francën e Europën, duke sjellë nga atdheu i tyre vlera dhe vegime të një Shqipërie europiane.
ALBUMI
Albumi "OPERA ATJON" u botua në ditëlindjen e 22- të të Atjon Zhitit, më 30 gusht. Brenda 250 faqeve me format të madh të "OPERA ATJON" përmblidhen skica të fëmijërisë dhe të adoleshencës së autorit, punime e kompozime të ndryshme, ku shpaloset një botë me plot fantazi, me lëvizje dhe dritë, me dashuri e ëndrra, që dëshmon furishëm dhe një anë tjetër të talentit shumë planesh të Atjonit. Albumi është përgatitur nga kritiku i artit, piktori dhe botuesi Gëzim Tafa. Albumi është dygjuhësh, shqip dhe italisht, ngaqë Atjoni studionte në Itali, në Universitetin "Sacro Cuore", në Milano, për Filozofi dhe ishte anëtari më i ri i PEN Club- it italian. Në faqen e parë të albumit janë vënë fjalët e Eda Zhitit, nënës së Atjonit: "… këto vizatime të Atjonit, të fëminisë dhe adoleshencës së tij, i ruaja si thesar timin për të ardhmen, që t'ia jepja një ditë si befasi e bukur… por Ai, me flatra qiellore, befasisht u largua dhe na i la të gjitha për t'ua dhënë të gjithëve…". Në parathënien e tij, "Kutia me xixëllonja", studiuesi dhe kritiku i artit, Prof. Gëzim Qendro, kuratori dhe i ekspozitës së Atjonit në Universitetin "Polis" ndër të tjera shpjegon: "... të rrethuar nga vallëzimi i dritëzave misterioze nisim të ecim përmes tyre dhe fillojmë të dallojmë në mugëtirën e kopshtit shëmbëllesa, forma dhe silueta shpesh të pakuptueshme...”