SHBA për Tahirin: Askush s’duhet të gëzojë imunitet nga ligji, mbështesim prokurorët
Yee: Nuk besojmë se individët duhet të shënjestrohen pse i takojnë një partie politike, mbështesim Qeverinë që jep shembullin
Shtetet e Bashkuara të Amerikës mbështesin prokurorët e gjyqtarët në Shqipëri dhe i inkurajojnë ata që të bëjnë hetime, si dhe të japin dënime qoftë edhe në nivelet më të larta të administratës.
Në një intervistë për “Zërin e Amerikës”, zv. ndihmëssekretari amerikan i Shtetit, Hoyt Brian Yee, i pyetur për rastin e ish- ministrit Saimir Tahiri, deklaron se askush nuk mund të jetë mbi ligjin dhe askush nuk mund të gëzojë imunitet nga ligji. Sipas Yee, qeveria është ajo e cila duhet të japë shembullin dhe të demonstrojë para qytetarëve se është e përkushtuar të luftojë korrupsionin. “Sinqerisht, nuk mund të flas dot mbi rastet individuale, por gjithsesi besojmë në disa parime. I pari është se ligji duhet të jetë i zbatueshëm për të gjithë njësoj, askush nuk duhet të jetë mbi ligjin, askush nuk mund të gëzojë imunitet nga ligji. Mbështesim plotësisht prokurorët dhe gjykatësit, të cilët ndjekin hetimet, dënimet, kudo që ato çojnë, në nivele të larta apo të mëposhtme të administratës. Nuk besojmë se individët duhet të shënjestrohen pse i takojnë një partie politike apo një tjetre, por parimi themelor është se askush nuk duhet të jetë mbi ligjin. Së dyti, ne mbështesim qeverinë, që jep shembullin. Qeveria është ajo e cila duhet të japë shembullin dhe të demonstrojë para qytetarëve se është e përkushtuar të luftojë korrupsionin, qofshin ata qytetarë, zyrtarë qeveritarë, të huaj, shqiptarë… dhe se Shqipëria është serioze në përpjekjet e saj për të luftuar korrupsionin”, deklaroi Yee.
DREJTËSIA Zv. ndihmëssekretari amerikan i Shtetit shprehet i kënaqur për mbështetjen që SHBA- të i kanë dhënë Shqipërisë për të realizuar Reformën në Drejtësi. Yee thekson se reformat janë një nga kushtet kryesore që Shqipërisë i duhet për të hyrë në BE dhe për realizimin e tyre, vendi do të ketë mbështetjen e vazhdueshme të SHBA- ve. “Më lejoni të them për Shqipërinë, se jemi shumë të kënaqur me përparimin që Shqipëria ka arritur dhe jemi të kënaqur që Shtetet e Bashkuara kanë pasur mundësinë të kontribuojnë në reformat, përfshirë këtu edhe Reformën në Drejtësi. Bashkërisht me Bashkimin Europian, Shtetet e Bashkuara kanë ndihmuar Shqipërinë të miratojë legjislacionin, të miratojë ndryshimet kushtetuese, me synimin që të forcojë sistemin e drejtësisë. Dhe kjo për faktin se një gjë e tillë nuk është e rëndësishme vetëm për sundimin e ligjit në Shqipëri dhe për kushtet në të cilat jetojnë qytetarët e saj, por edhe për faktin se reformat janë një nga kushtet kryesore për anëtarësimin e Shqipërisë në Bashkimin Europian”, tha Yee. Zv. ndihmëssekretari amerikan i Shtetit deklaron se SHBA- të po japin ndihmë përmes ekspertizës teknike, financiare, në mënyrë që gjyqtarët dhe prokurorët të kryejnë siç duhet punën e tyre. “Në këtë frymë, ne kemi vazhduar të mbështesim përpjekjet e Shqipërisë për të zbatuar reformat në sundimin e ligjit, e po ashtu edhe në luftën kundër krimit, kundër krimit të organizuar, kundër korrupsionit... Të gjitha këto shërbejnë për të ngritur standardin jetësor për qytetarët e Shqipërisë, por edhe për ta ndihmuar përparimin e Shqipërisë drejt anëtarësimit në Bashkimin Europian. Së këndejmi, jemi duke ofruar drejtpërdrejt ndihmën tonë, ekspertizën teknike, ndihmën financiare në ndërtimin e strukturave, në trajnimin e gjykatësve dhe prokurorëve, për t’i ndihmuar që të kryejnë punën e tyre”, u shpreh Yee.