Unioni i Gazetarëve: Arrogancë e fyerje, bojkotojeni Kryeministrin
Unioni i Gazetarëve Shqiptarë e ka cilësuar të papranueshme sjelljen e Kryeministrit Rama me gazetarët dhe ka kërkuar që media ta braktisë veprimtarinë e kreut të qeverisë ditën e premte. Përmes një reagimi për mediat, Unioni i Gazetarëve thekson se kryeministri në mënyrë të përsëritur ka përdorur etiketime fyese dhe injoruese ndaj mediave. “Deklarimet e ditës së sotme të zotit Edi Rama, kryeministër i Shqipërisë, drejtuar reporterëve të mediave të vendit, janë një arrogancë në komunikim dhe fyerje e një përfaqësuesi të lartë politik dhe shtetëror ndaj gazetarëve në përgjithësi. Kryeministri i vendit në mënyrë të përsëritur përdor publikisht etiketime fyese dhe injoruese ndaj mediave të vendit dhe gazetarëve. Pohime të tilla dhe etiketimet në fjalë përbëjnë një precedent të rrezikshëm në marrëdhëniet mes dy pushteteve të njohura në jetën e sotme të shoqërisë, përkatësisht të ashtuquajturit pushtet Ekzekutiv dhe atij të medias”, thuhet në reagimin e Unionit të Gazetarëve. Për unionin, kjo sjellje dhe ky komunikim fyes i kryeministrit kanë një lidhje dhe mbartin edhe përgjegjësinë e madhe për gjendjen kritike në të cilën gjenden gazetarët sot. “Unioni i Gazetarëve Shqiptarë me indinjatë deklaron se kjo sjellje dhe ky komunikim fyes i kryeministrit kanë një lidhje dhe mbartin edhe përgjegjësinë e madhe për gjendjen kritike në të cilën gjenden gazetarët e sotëm në vend, ndërkohë që vlerësojmë se është përgjegjësia e Tij dhe e institucioneve të tjera ligjore që gjatë kësaj kohe informaliteti dhe shembja e vlerave profesionale po shndërrohen në plagë të mëdha, çdo ditë e më tepër në jetën mediatike të vendit. Unioni i Gazetarëve Shqiptarë propozon për gazetarët një bojkot të veprimtarisë së Kryeministrisë në ditën e premte. Ftojmë gjithë editorët e medias shqiptare të bëhen pjesë e këtij reagimi refuzues”, thuhet në reagimin e Unionit të Gazetarëve.