Deville: Budallallëk çështja e përkthimit të drafteve të Vetingut
Ish- kreu i EURALIUS: Reforma në Drejtësi një vit me vonesë, ka humbur vëmendja
Ish- drejtuesi i Misionit EURALIUS, Rainer Deville, tha dje se akuzat për përkthim gabim të draftit të vetingut nga ana e Misionin të BE- së ishin një budallallëk.
Në një intervistë për gazetën “Panorama”, Rainer Deville vëren se Reforma në Drejtësi nuk ka ritmin e mëparshëm dhe se për këtë duhen vendosur prioritete. Vonesat në veting, sipas Deville, kanë sjellë një vit vonesë në zbatimin e Reformës në Drejtësi. Edhe drejtuesi i zyrës së fondacionit “Konrad Adenuaer”, Walter Glos, tha se në këtë moment kur janë miratuar të gjitha draftet, nuk duhet të ketë më ngadalësi dhe kjo do të përshpejtonte punën.
Cili është mendimi juaj për ecurinë e Reformës në Drejtësi? Ju thatë se ajo është ngadalësuar, përse?
Rainer Deville: Qëllimi i seminarit ishte pikërisht për këtë, se si ne mund të punojmë që reforma të ecë përpara dhe të shpejtohet. Nga analizat që janë bërë del se shpejtësia e Reformës në Drejtësi lidhet me vetingun, i cili ende nuk ka nisur të zbatohet. Në vitin 2017, progresi i reformës nuk ka qenë aq i madh dhe bindës, sa në vitin 2016. Vëmendja për Reformën në Drejtësi ka humbur dhe ngjarje të tjera kanë tërhequr vëmendjen e publikut. Procesi ka një vit vonesë dhe nuk ka filluar ende si duhet, edhe pse tani duhet të ishte drejt fundit. Kini parasysh se kjo reformë nuk i përket vetëm një partie, kjo i përket gjithë politikës dhe qytetarëve.
Walter Glos: Po ta shohim nga këndvështrimi politik, do të shohim se nga vjeshta e kaluar ka pasur dhe një ngërç politik, ku Partia Socialiste dhe Partia Demokratike kanë qenë në njëlloj ballafaqimi dhe mungese bashkëpunimi. Sepse ndërlidhen këtu edhe çështjet profesionale, bashkë me zhvillimet politike. Ajo që doli në seminarin e sotëm lidhet me institucionet. Sikurse e tha zoti Deville dhe profesor Hoxha, janë krijuar strukturat, ligjet kanë hyrë në fuqi, këto duhet të përcillen në institucione që të nisë puna. Në këtë moment nuk duhet të ketë më ngadalësi dhe kjo do të përshpejtonte punën.
Cili institucion duhet ta shtyjë më tutje këtë reformë, sepse Parlamenti e përfundoi punën e tij?
Walter Glos: E para, krijimi i institucioneve dhe vendosja e tyre në punë, krijimi i hapësirave që u parashikon ligji, kjo është ajo që duhet bërë. Pa dyshim dhe politika sa i takon, duhet t’i mbështesë. Edhe në seminar u theksua se secili, sa i lejon legjislacioni, duhet të bëjë punën e vet. Sigurisht që është e rëndësishme që të përcaktohen prioritete, sikundër e përmendi dhe zoti Deville në fjalën e tij, është shumë e rëndësishme që të ketë një plan operativ me afate se kur duhet të bëhet një gjë dhe kur një gjë tjetër.
Unioni i Gjyqtarëve iu drejtua Gjykatës Kushtetues për disa probleme që sipas tyre kishte ligji i vetingut e që lidhet me shkeljen e të drejtave të njeriut. A i cenon vetingu këto të drejta?
Rainer Deville: Ligji i vetingut u bë sipas standardeve ndërkombëtare dhe në bashkëpunim me Komisio- nin e Venecias dhe është e pamundur që ai të cenojë dhe të prekë të drejtat e gjyqtarëve. Sigurisht që këtë duhet ta thotë Gjykata Kushtetuese, por sipas pikëpamjes sonë, nga përvoja ndërkombëtare, në bashkëpunim me Komisionin e Venecias, kjo është futur si proces i pazakontë, por ne jemi të bindur se nuk i cenon.
Zoti Deville, ju u larguat nga drejtimi i Misionit të EURALIUS- it në momentin më deciziv të reformës. Ishte kjo si pasojë e ndonjë gabimi të bërë nga misioni, siç ishte rasti i përkthimit të draftit?
Rainer Deville: Përkthimi s’ka të bëjë fare me këtë gjë. Ky është një budallallëk. Sepse ne nuk jemi marrë fare me përkthimin. Ka pasur shumë versione të ligjeve dhe kur ne i përgatisnim ato, na vinin shumë drafte që edhe ne përkthenim, por nuk ishim ne zyra e përkthimit. Ndoshta dikush mori një version përkthimi pa e kontrolluar, pa e verifikuar me të tjerët dhe e përdori atë. Kjo ishte gjithë historia e përkthimit.
Pati dhe akuza që u adresuan edhe ndaj EURALIUS- it në atë periudhë...
Rainer Deville: Nuk ishte ndonjë sulm personal ndaj meje, kjo ishte pjesë e peizazhit mediatik shqiptar.
Walter Glos: Por nuk ishte kjo arsyeja pse zoti Deville erdhi sot, arsyet ishin krejtësisht të tjera. Ne jemi një fondacion politik, jemi më afër politikisht edhe me Unionin Kristiandemokrat, por ne punojmë dhe japim kontributin tonë në mënyrë që CDU, por dhe Grupi Parlamentar dhe koalicioni qeverisës CDU- CSU në një moment të marrë vendimin e duhur për Shqipërinë. Ne duam që mendimi dhe kontributi ynë të jenë i një niveli të lartë, në aktivitetet që zhvillojmë, duke ftuar përfaqësues shqiptarë dhe të huaj, e pamë të udhës që të sjellim doktor Deville që të japë mendimin e tij për Reformën në Drejtësi.