Drejtuesja e Vetingut: Do të jetë një derë e hekurt ndaj politikës

Instituti i Studimeve Politike, me mbështetjen e fondacionit gjerman “Konrad Adenauer” zhvilloi një tryezë ku të pranishëm ishin ish- shefi i Misionit EURALIUS në Shqipëri, Rainer Deville, i ardhur posaçërisht nga Gjermania për këtë tryezë, profesor Artan Hoxha, dekan i Fakultetit Juridik në Universitetin e Tiranës, Natasha Mulaj, kryetare e Kolegjit të Apelimit, si dhe përfaqësues të politikës, medias dhe studiues. Tryeza u zhvillua pas monitorimit nga Instituti i Studimeve Politike të ecurisë së Reformës në Drejtësi gjatë vitit 2017, ku janë parë aktet e miratuara ligjore, roli i Parlamentit dhe i institucioneve të drejtësisë etj. Kryetarja e Kolegjit të Apelimit, Natasha Mulaj, tha se në krye të institucionit të ri të drejtësisë nuk do të lejojë ndërhyrjet e politikës. “Sa të jem unë në krye të këtij institucioni, nuk do të lejoj ndërhyrje politike. Do të jetë një derë e hekurt ndaj politikës. Nëse do të shohim sikur edhe lëvizjen më të vogël, ne kemi të drejtë të mbledhim Komitetin e Disiplinës dhe të marrim masat që na lejon ligji. Jam shumë optimiste se procesi do të ecë pozitivisht, sepse këtë e kërkojnë shqiptarët”, tha Mulaj. Puna përpara institucioneve të reja të drejtësisë, sipas saj, nuk do të jetë e lehtë. “Unë jam e bindur se beteja që kemi përpara është shumë e vështirë. Do të përballemi me sulme, me përbaltje që nuk do të na kursejnë as personalisht, por asgjë dhe askush nuk do të mund të na ndalë në këtë përballje etike për të sotmen dhe të ardhmen e një Shqipërie të drejtë dhe të ndershme”, tha Mulaj.