Shoqata e Bashkive kundër taksës së pronës: Rëndohen qytetarët
Shoqata e Bashkive është kundër taksës së re të pronës. Drejtori ekzekutiv i shoqatës, Agron Haxhimali, tha për gazetën se taksa e re rëndon më shumë qytetarët dhe kjo do të vështirësojë arkëtimin e saj. Shoqata e Bashkive ngre edhe shqetësimin se vetë bashkitë janë të papërgatitura për ta arkëtuar taksën e re. “Ne si shoqatë jemi dakord të kemi një sistem modern të taksave, por për momentin ne e kemi kundërshtuar pasi kjo taksë do të rëndojë mbi xhepat e qytetarëve. Çdo qytetar që deri sot paguante një taksë fikse 1 euro në muaj apo 1 mijë lekë të vjetër në muaj, sot do të paguajë dyfishin, trefishin apo katërfishin e kësaj shume që paguan tani. Do të thotë, një shtëpi në Tiranë, që ka vlerën 100 mijë euro, një qytetar sot ka paguar 10- 15 euro në vit, në vitin 2018 do të paguajë 50,70100 euro në vit. Pra, sipas zonave taksa është dyfishuar, trefishuar apo katërfishuar. Duke qenë se kjo taksë rritet, do të jetë e pamundur të paguhet nga qytetarët për shkak të gjendjes ekonomike”, u preh Haxhimali. Për shoqatën e bashkive, shqetësim mbetet edhe arkëtimi i taksës së re, pasi bashkitë janë të papërgatitura për arkëtimin e saj. “Superstruktura administrative e pushtetit qendror nuk është e përgatitur, ka mjaft institucione qeveritare, Hipoteka, ALUIZNI, Entet e Banesave, pra ka një konglomerat institucionesh. Këto që kanë të bëjnë me çështjen e pronave janë vetë të papërgatitura për t’i hyrë kësaj prone, sepse nuk kanë një inventarë të qartë se kujt u përkasin pronave. Edhe bashkitë nuk janë aq të konsoliduara sa të administrojnë këtë taksë prone siç duhet”, tha Haxhimali.