Veliaj: Të përgatitur për rastet e emergjencave
Bashkia e Tiranës ka ngritur pritën e parë për t’i bërë ballë stinës së dimrit dhe reshjeve të shiut, të cilat janë të zakonshme gjatë periudhës së ftohtë. Një fond i posaçëm ushqimesh dhe veshmbathjesh për t’u ardhur në ndihmë njerëzve në nevojë në raste emergjencash. Kryebashkiaku Erion Veliaj tha se deri më tani janë marrë masa për të përballuar 200- 300 raste problematike. Ai u bëri thirrje të gjitha bizneseve apo shoqatave të ndryshme që të kontribuojnë me aq sa munden për ta përgatitur qytetin akoma më mirë, por edhe për ta bërë Tiranën një qytet më social. “Nuk mjafton të jesh biznes i suksesshëm, nëse këtë sukses nuk e ndan, sidomos në ditën e nevojës, me ata që janë në situatë të vështirë. I falënderoj me zemër për bujarinë e tyre dhe për faktin që rezervat e qytetit të Tiranës janë gjithmonë plot. Teksa përballojmë nevoja të ndryshme, gjithmonë rifurnizohemi për t’u siguruar që dita e nevojës na gjen në gatishmëri të plotë”. Teksa vlerësoi punën e mirë që u bë gjatë dimrit që shkoi për menaxhimin e situatave të emergjencave civile, ku 200 qytetarë në situatë rruge gjetën një strehë të ngrohtë dhe ushqim pranë qendrave sociale të bashkisë, Veliaj kërkoi bashkëpunimin e qytetarëve që të ndihmojnë këdo që është në vështirësi. Paralelisht me përgatitjet për situatat emergjente që mund të krijohen si pasojë e reshjeve të shiut apo temperaturave të ulëta, Bashkia e Tiranës ka nisur punën edhe për parandalimin e përmbytjeve në zonat pranë lumenjve. Kreu i bashkisë nënvizoi se ndërmarrjet janë duke pastruar nga inertet kanalet dhe lumenjtë, ndërsa paralajmëroi vijimin e aksionit për prishjen e ndërtimeve pa leje që janë ndërtuar mbi kolektorë. “Përveç përgatitjes për emergjencat, të gjithë e kanë vënë re se gjatë verës kemi bërë punë në infrastrukturë, duke pastruar lumin e Lanës, kemi hequr qindra tonë inerte, kemi pastruar kanalet e ujërave të zeza në pritje të shirave, te Lumi i Tiranës kemi bërë prishjet e fundit për të mbyllur barrierat e për t’u siguruar që në shirat e ardhshëm të mos kemi ujë që futet nëpër lagje. Do të vazhdojmë me prishjet e ndërtimeve pa leje, sidomos mbi kolektorë, për të dhënë edhe një mesazh që tahmaja e një njeriu nuk mund të kthehet në fatkeqësi për 1 milion të tjerë”, theksoi Veliaj.