“Besojeni germë për germë kërcënimin tonë bërthamor”
Zyrtari koreanoverior flet për CNN: Ne i vëmë në veprim fjalët tona
Kërcënimi për luftë nukleare botërore që mund të nisë nga Koreja e Veriut nuk është zbehur, edhe pse shkëmbimet e deklaratave të tensionuara mes Kim Jong Un dhe Donald Trump nuk janë të shpeshta si më parë.
Një zyrtar i lartë i Koresë së Veriut ka paralajmëruar botën se duhet të marrë si të vërtetë, germë për germë, kërcënimin e vendit të tij për të testuar një armë bërthamore mbi tokë. Zyrtari Ri Yong Pil, tha për CNN në një intervistë ekskluzive në Penian, se “kërcënimi i bërë nga ministri i Jashtëm i Koresë së Veriut muajin e kaluar nuk duhet të merret lehtë. Koreja e Veriut gjithmonë i ka vënë në veprim fjalët e saj”, ka thënë Ri i zemëruar, sipas raportimit të CNN. Duke folur gjatë një vizite në Nju Jork, në Asamblenë e Përgjithshme të Kombeve të Bashkuara muajin e kaluar, ministri i Jashtëm Ri Yong Ho ngriti mundësinë që Koreja e Veriut mund të provonte një bombë të fuqishme hidrogjeni mbi Oqeanin Paqësor. Kërcënimi erdhi pasi Presidenti i SHBA, Donald Trump, kërcënoi të shkatërronte tërësisht Korenë e Veriut gjatë fjalimit të tij të parë në OKB. “Ministri i Jashtëm është shumë i vetëdijshëm për qëllimet e liderit tonë suprem, kështu që unë mendoj se ju duhet ta merrni seriozisht çdo fjalë të tij”, tha Ri për CNN. Koreja e Veriut zhvilloi testet më të forta të periudhës gjashtëvjeçare, në fillim të shtatorit, duke pretenduar se kanë përdorur një bombë hidrogjeni. OKB iu përgjigj testimit duke imponuar sanksione të reja ndaj këtij vendi. Kërcënimet e vazhdueshme të Koresë së Veriut i kanë vënë fqinjët e saj në Paqësor në alarm të lartë. Në shtator, Peniani testoi një raketë balistike mbi Japoni. Kur Koreja e Veriut zhvilloi testin e saj të gjashtë bërthamor, ajo deklaroi se kishte shpërthyer një bombë hidrogjeni që mund të përshtatej në kokën e një rakete balistike. Peniani kërcënoi se do të hidhte raketa në ujërat jashtë territorit të Guamit, në Paqësor, SHBA.