Hetuesit në shtëpinë e Tahirit, Lu: Askush mbi ligjin, e vërteta nuk u përket partive
Kreu i PD: Rama refuzon të bëhet pjesë e zgjidhjes
Kryetari i opozitës, Lulzim Basha, ka zhvilluar një takim me ambasadorin e SHBAve në Tiranë, Donald Lu, një ditë pasi Parlamenti vendosi me 75 vota pro të mos i aprovojë Prokurorisë kërkesën për arrestimin e deputetit Saimir Tahiri.
Takimi i Bashës me diplomatin amerikan në Tiranë erdhi pas deklaratave të zëvendësndihmëssekretarit amerikan të shtetit, Hoyt Brian Yee, se SHBA do të mbështesë prokurorët dhe gjyqtarët në Shqipëri për të bërë hetime dhe për të dhënë dënime edhe në nivelet më të larta të administratës. Në përfundim të takimit me Lu, kreu i PD- së Basha u shpreh optimist se ish- ministri Saimir Tahiri nuk do të arrij t’i shpëtojë përballjes me drejtësinë, duke kujtuar se opozita po bashkëpunon me partnerët ndërkombëtarë. “Sajmir Tahiri nuk do t’i shpëtojë drejtësisë. Pavarësisht prej mbrojtjes politike që i bëri dje maxhoranca, faktet e dala publikisht dhe faktet e tjera të cilat disponohen nga organet shqiptare të hetimit, nga Prokuroria shqiptare, por dhe nga partnerët, do të bëjnë të mundur që ai të marrë përgjegjësitë e tij penale para ligjit shqiptar për mbrojtjen dhe ndihmën që i ka dhënë, jo thjesht një bande kriminale, por përpjekjes për ta kthyer Sh- qipërinë vetëm në katër vite në një bazë të sigurt të krimit të organizuar, në prodhuesin më të madh të kanabisit në Europë dhe eksportuesin e drogave të lehta dhe të forta drejt Europës. Këto janë konstatime të institucioneve perëndimore, nuk janë thjesht dhe vetëm konstatime të opozitës, e cila pa dyshim kanë qenë në ballë të kësaj beteje. Rama vazhdon të jetë, siç ka qenë prej fillimit, pjesë e problemit dhe refuzon të bëhet pjesë e zgjidhjes”, deklaroi Basha. Sipas kreut të opozitës, ishministri Tahiri do të jetë vetëm fillimi i një procesi që do të çmontojë narkoshtetin. Basha theksoi se PD do të mbështesë në mënyrë të plotë organet e drejtësisë. “Sajmir Tahiri nuk është fundi, por është fillimi i një pro- cesi të çmontimit të narkoshtetit, të çmontimit të mafies së narkotikes, që ka kapur shtetin. Kjo luftë, e cila sapo ka filluar, nuk do të jetë as e lehtë dhe as e shkurtër. Por Partia Demokratike do të ketë rolin e saj jashtëzakonisht të rëndësishëm në këtë luftë, në planin e mbështetjes totale ndaj organeve të zbatimit të ligjit, në veçanti ndaj prokurorisë dhe gjykatave të vendit. Kjo është një përpjekje të cilën ne e bëjmë në bashkëpunim me partnerët strategjikë të Shqipërisë, me BE- në dhe SHBA- të, dhe jemi krah për krah me ta. Beteja sapo ka nisur dhe jemi shumë të inkurajuar nga mbështetja që i është dhënë dhe do t’i jepet në ditët dhe javët në vazhdim kësaj beteje jetike për të ardhmen e Shqipërisë dhe për integrimin europian të Shqipërisë, që kalon vetëm përmes çmontimit të narkoshtetit”, tha Basha. Kreu i PD- së paralajmëroi se krahas emrit të Saimir Tahirit, në skenën politike do të dalin edhe zyrtarë të tjerë të qeverisë të lidhur me krimin dhe përfaqësues të botës së krimit. “Edhe opozita, edhe partnerët kanë informacione të besueshme dhe të shumta për rolin e individëve, politikanëve me pushtet në kthimin e Shqipërisë në një bazë të sigurt të krimit të organizuar dhe trafikut të drogës. Është detyra jonë si opozitë që në bashkëpunim dhe në bashkërendim me partnerët ndërkombëtarë të bëjmë jo thjesht dhe vetëm denoncimin publik të këtyre fakteve, por të sigurohemi që Prokuroria shqiptare dhe Gjyqësori shqiptar, këta individë, sado të pushtetshëm qofshin, anëtarë të kabinetit, drejtues të lartë të pushtetit, të trajtohen njësoj para ligjit si çdo qytetar shqiptar dhe të marrin para drejtësisë atë që meritojnë”, u shpreh kreu i opozitës.