E paparë dhe e padëgjuar, Arabia Saudite i jep shtetësinë një ROBOTI
Çfarë po ndodh me botën? Çfarë do të ndodhë me njerëzimin? Sa vlerë do të ketë ekzistenca e racës njerëzore, nëse edhe krijesat motorike me inteligjencë artificiale kryejnë të gjitha veprimet dhe funksionet tona dhe, mbi të gjitha, nisin të identifikohen edhe ligjërisht njësoj si njerëzit? Pyetje të shumta qarkullojnë ndërkohë që Arabia Saudite i ka dhënë nënshtetësinë një roboti. Kjo është skena më e fundit surrealiste nga samiti ekonomik "Davos në shkretëtirë", ku liderët e Arabisë Saudite po përpiqen të impresionojnë pjesën tjetër të botës me ambiciet e tyre ekonomike. Në një takim treditor në Arabinë Saudite, deri tani kemi parë të ndërmerren vendime revolucionare, si synimi për të ndërtuar një qytet krejtësisht të ri, të quajtur Neom. Princi i kurorës, Mohammed bin Salman, shpalli planet për ndërtimin e një qyteti në brigjet e Detit të Kuq, duke premtuar një stil jetese të pamundur sot në Arabinë Saudite, ndërkohë që ka premtuar të moderojë vendin. Princi 32- vjeçar, i cili u ngrit menjëherë në pushtet, po përpiqet të përgatisë Arabinë Saudite për epokën e pasnaftës. Neom, ka thënë Princi, do të jetë një qytet që do të funksionojë tërësisht me energji të pastër dhe nuk do të jetë hapësira për asgjë tradicionale. Ndërsa njoftimi se një robot i quajtur Sophia ka marrë shtetësi saudite i habiti të gjithë. Krahas një luani holografik dhe trenave rrotullues virtualë, një robot është shfaqur në Iniciativën e Investimeve të së Ardhmes, të mbajtur nga Fondi i Investimeve Publike Saudite. "Faleminderit Mbretë- risë së Arabisë Saudite. Është historike të jesh roboti i parë në botë që merr shtetësi", tha roboti i quajtur Sophia. Njoftimi mund të jetë i diskutueshëm mes sauditëve konservatorë, shumë prej të cilëve besojnë se përfaqësimi i formës njerëzore, madje edhe në art apo në manekin, është sakrilegj.