Cana, ambasador i "Grasroots": I orientuar jashtë vendit për karrierën
Një muaj më parë, FSHF e linte krejtësisht në harresë projektin e futbollit të bazave "Grasroots" dhe fëmijët luajtën në asfalt. Së fundmi, institucioni i futbollit ka kthyer vëmendjen te ky projekt. Me anë të një vendimi të Komitetit Ekzekutiv, FSHF ka emëruar ish- kapitenin e Kombëtares, Lorik Cana, si ambasador të këtij projekti, i cili do të ketë misionin që të mund të afrojë sa më shumë të rinj rreth sportit. Në këtë ceremoni, kreu i FSHF- së ka deklaruar dje se investimi te fëmijët është nevojë imediate. "Është prioritet absolut i federatës, kryesisht futbolli i fëmijëve. Sot, akoma më shumë duhet të mendojmë për të ardhmen. Pra, investimi, jo vetëm duke emëruar Lorikun si ambasador, i cili besoj se do të jetë një shembull shumë i mirë. Çdo fëmijë duhet ta ketë dhe besoj se e ka ëndërr që të bëhet i suksesshëm si Lorik Cana", ka deklaruar ndër të tjera Duka.
LORIK CANA
Ish- kapiteni i Kombëtares tha se e ndien si detyrim personal që të ndikojë në përçimin e vlerave të sportit te fëmijët: "Duke qenë njeri i sportit, kam dëshirë dhe e ndiej të nevojshme që të vazhdoj të sensibilizoj dhe të kontribuoj për vlerat e futbollit në vendin tonë. ' Grasroots' është shumë i orientuar te fëmijët dhe duke u marrë me fëmijët te fondacioni, njëherazi edhe në këtë projekt, besoj se kjo gjë do t'i ndihmojë që të kenë dashurinë për futbollin. Pavarësisht se dihet që jo të gjithë do të jenë futbollistë. Ama, duke u marrë me sport, duke mbajtur regjim, do të shtojnë vetëbesimin, do të jenë më të shëndetshëm dhe kjo i bën njerëz më të mirë në shoqëri. Brenda vitit do të hapet pika e fondacionit në Kosovë, por do të bisedoj edhe me Fadil Vokrrin që të mund të ndihmojë edhe ai në këtë aspekt".
Menaxheri i Kombëtares-
Cana është pyetur edhe në lidhje me postin e menaxherit të Kombëtares, nëse do ta pranonte: "Nuk ka arsye që çfarëdolloj bashkëpunimi i nevojshëm ose nga dëshira e secilit, të mos shkojë deri tek arritja e saj. Në momentin që jam tërhequr, dyert i kam pasur të hapura për mundësi dhe lehtësi në çdo dëshirë dhe plan që unë kam. Ka qenë dëshirë e imja që e kam ende, pasi kam nevojë që të merrem me projekte që më marrin kohë dhe me dëshira person- ale. Nga aspekti profesional i imi, jam i orientuar më shumë jashtë Shqipërisë. E marr si karikim që të vazhdoj të ndihmoj dhe sensibilizoj vendin tonë me projektin, bashkë me federatën "Grasroots", si dhe me fondacionin tim. Besoj se për momentin është më se i mjaftueshëm, madje, do të kemi shumë punë", ka deklaruar ndër të tjera Cana.