Universiteti i Tiranës, 43% e studentëve: Ka korrupsion për notat
Ndërhyrje me anë të të tretëve dhe ryshfet për notë kaluese
Ndërhyrje me anë të familjes, të afërmve, apo edhe para nën dorë për një notë më të mirë, ose për të mos e parë veten në listën e mbetësve.
Ky “kompromis i heshtur” mes studentëve dhe pedagogëve vazhdon të damkosë institucionet tona të arsimit të lartë. Kështu, në Universitetin e Tiranës, pothuajse gjysma e studentëve të intervistuar kanë pranuar se ekziston korrupsioni. Të dhënat janë pjesë e një raporti të realizuar nga Këshilli Rinor i Ambasadës Amerikane me mbështetjen e kësaj të fundit. Pjesë e studimit u bënë rreth 1 mijë studentë, nga 5 fakultete në UT, përkatësisht Fakulteti i Ekonomisë, Fakulteti Juridik, Fakulteti i Shkencave Sociale, Fakulteti i Histori- Filologjisë dhe Fakulteti i Gjuhëve të Huaja.
GJETJET Nisur nga gjetjet, 43% e studentëve kanë konfirmuar ekzistencën e korrupsionit. Forma më e përmendur e ndërhyrjes në mënyrë abuzive sipas tyre është ajo përmes të tretëve, qofshin familjarë apo të afërm dhe më pas është forma e ryshfetit. Bazuar në përvojën të gjithsecilit, pjesa më e madhe e rasteve abuzive në fakultet kanë të bëjnë me favorizimin lidhur me vlerësimin për lëndën. Pas kësaj renditet marrja e lëndës pa e frekuentuar atë. Forma më e përmendur e presionit të përdorur nga pedagogët gjatë periudhës së sezonit është ajo e “presionit psikologjik”, nga ku studentët përjetojnë shumë ankth dhe pasiguri. Por, pavarësisht se janë të mendimit se korrupsioni duhet të luftohet, një pjesë prej tyre ngurojnë ta denoncojnë atë. Kjo, sa prej frikës, aq edhe prej mosndëshkimit, duke krijuar idenë se raportimi nuk jep efekte. “Studentët perceptojnë nivel të lartë korrupsioni në sistemin arsimor dhe fakultetin e tyre, por pjesa dërrmuese nuk janë të gatshëm të raportojnë sjellje korruptive. Kjo e fundit vjen përgjithësisht për shkak se nuk kanë besim në zgjidhjen e problemit, si dhe në frikën se do të penalizohen si pasojë e raportimit të bërë prej tyre”, thuhet në studim.
MASAT Raporti me temë “Lufta kundër korrupsionit në arsimin e lartë në Shqipëri” jep një panoramë të situatës mbi këtë fenomen, por njëherazi parashtron edhe disa nga rrugët që do të shpinin në zbutjen apo minimizimin e tij. Një e tillë do të ishte edhe ajo për hapjen e një portali në çdo fakultet, tek i cili do të adresoheshin të gjitha ankesat dhe do të denoncoheshin aktet korruptive të konstatuara gjatë orëve të mësimit apo në sezon provimesh. Për hartuesit e projektit, është me rëndësi të madhe parandalimi dhe lufta e hapur ndaj këtij fenomeni, prezenca e të cilit po kërcënon cilësinë e procesit mësimor duke e shoqëruar këtë efekt me faturën e profesionistëve aspak të zotë që nesër do të marrin në duar fatin e vendit. Në parathënien e studimit, vihet në dukje po ashtu edhe neglizhenca e qeverisë ndaj çështjes së korrupsionit në këtë sektor, në raport kjo me sektorë të tjerë siç janë sistemi gjyqësor, sistemi i kujdesit shëndetësor apo shërbime të tjera publike.