Përjashtoi Bashën, Ruçi në Hungari flet për konsensus
“Prioritet i Kuvendit, forcimi i dialogut politik e konstruktiv”
“Forcimi i dialogut politik e konstruktiv me opozitën parlamentare”, sipas kryetarit të Parlamentit, Gramoz Ruçi, është prioriteti i maxhorancës së majtë.
Këtë deklaratë Ruçi e ka bërë dje gjatë Konferencës së 8- të të kryetarëve të Parlamenteve të vendeve të Ballkanit Perëndimor, që po zhvillon punimet në Budapest të Hungarisë. Ndërkohë që marrëdhëniet në Parlamentin e Shqipërisë janë tensionuar së fundmi, për shkak të qëndrimit strikt të Gramoz Ruçit, i cili në dy javët e shkuara përjashtoi nga punimet e Kuvendit liderin e opozitës, Lulzim Basha, dhe deputetin e PD, Flamur Noka. Por Ruçi ka deklaruar në Budapest se klima e konsensusit vazhdon që pas marrëveshjes së 17 majit. “Në kuadër të Reformës në Drejtësi, reformë themelore për avancimin tonë me axhendën europiane, Kuvendi i Shqipërisë ka miratuar me unanimitet 7 ligjet prioritare që shoqërojnë amendimet kushtetuese, duke përfshirë ligjin për vetingun; ka miratuar 13 ligje nga paketa e 27 projektligjeve të Reformës në Drejtësi; si dhe ka vijuar punën për hartimin e 14 projektligjeve të tjera të kësaj pakete ligjore. Prioritet i Kuvendit të Shqipërisë ka vijuar të jetë forcimi i dialogut politik e konstruktiv ndërmjet maxhorancës parlamentare dhe opozitës, konkretizuar dhe në marrëveshjen e 17 majit 2017, e cila solli përmirësimin e klimës politike në vend dhe riktheu opozitën në Parlament”, ka thënë Ruçi. Sipas tij, marrëdhëniet janë aq të mira, saqë mundësuan zgjedhjet më të qeta gjatë gjithë këtyre viteve. “Kjo marrëveshje bëri të mundur zhvil- limin e zgjedhjeve të qershorit 2017 të qeta, të lira, demokratike, të gjithëpranuara nga i gjithë spektri politik dhe të vlerësuara pozitivisht nga konkluzionet e OSBE- ODIHR dhe nga Këshilli i Europës”, u shpreh ai. Po ashtu, konsensusi vazhdoi për ligjet e Reformës Zgjedhore dhe Re- formës në Drejtësi. “Kuvendi ka miratuar me konsensus të gjerë tre ligje në kuadër të Reformës Zgjedhore, si dhe ka miratuar me konsensus tre institucione të rivlerësimit kalimtar të gjyqtarëve dhe të prokurorëve në Republikën e Shqipërisë, duke përmbushur një nga detyrimet kryesore që Shqipëria ka në këtë fazë të procesit të integrimit në BE”, ka thënë kreu i Kuvendit, i cili ka shtuar se: “Anëtarësimi i plotë në BE, qëllimi ynë i përbashkët, do t’u shërbente më së pari qytetarëve tanë, duke krijuar institucione të besueshme dhe një shtet në të cilin sundon ligji”.