Katalonja shpall pavarësinë, Madridi gati për të ndërhyrë
Spanja i jep "Ok" nenit 155 vetëm 40 minuta pas pavarësisë
Senati spanjoll i dha qeverisë qendrore në Madrid kompetenca të paprecedentë mbi Katalonjën të premten, vetëm 40 minuta pasi rajoni shpalli pavarësinë.
Kryeministri i Spanjës, Mariano Rajoy, tha se ai po e shkrin Parlamentin e Katalonjës dhe kërkon mbajtjen e zgjedhjeve rajonale. Kështu u përshkallëzua një krizë kushtetuese në qendër të Europës Perëndimore. Të dyja votat e parlamenteve, një për pavarësi dhe një për të rivendosur sundimin kushtetues, erdhën pas seancave të njëpasnjëshme në Barcelonë dhe Madrid. Qeveria qendrore fitoi me lehtësi leje për të marrë kontrollin e Katalonjës. Ndërkohë, separatistët në Katalonjë u përballën me akuza të hidhura nga rivalët katalanas, të cilët e quajtën masën për nacionalizëm një grusht shteti dhe një gabim historik, një muaj pas një referendumi që mbështeti një ndarje nga Spanja. Pavarësinë në Katalonjë Spanja po e sheh si një kryengritje. Gjykata Kushtetuese nisi procedimet kundër shpalljes së pavarësisë së Parlamentit katalanas. Sipas "Washington Post", ka pasur raportime se prokurorët spanjollë po përgatisnin akuza për rebelim kundër presidentit katalanas, Carles Puigdemont. Udhëheqësit e Europës kanë frikë nga një krizë tjetër e brendshme pas përmbysjeve të mëdha, si dalja e Britanisë nga blloku dhe kriza financiare në Greqi. Menjëherë pas votimit për pavarësi, Presidenti i Këshillit të Europës, Donald Tusk, shkroi: "Për BE nuk ndryshon asgjë. Spanja mbetet bashkëbiseduesi ynë i vetëm. Shpresoj që qeveria spanjolle të favorizojë forcën e argumentit, jo argumentin e forcës". Shprehja e Tusk pasqyroi frikën në Katalonjë, se qeveria spanjolle do të përdorë taktika policore të ashpra për të marrë kontrollin e rajonit. Është e paqartë se çfarë do të ndodhë tani. Gjykata Kushtetuese e Spanjës pothuajse me siguri do ta dek- larojë pavarësinë të paligjshme, qeveria qendrore do të përpiqet të marrë përsipër ministritë rajonale katalanase dhe reagimi në rajonin separatist mund të jetë kaotik. Pak vende në Europë kanë treguar gatishmëri deri tani për të njohur një Katalonjë të pavarur. Votimi përfundimtar ishte 70 vota për njohjen e pavarësisë, 10 vota kundër dhe 55 deputetë nuk pranuan të votonin. Ky proces në Parlamentin katalanas tregoi se mes grupeve politike në rajon ka ndasi të mëdha. "Ne kemi fituar lirinë për të ndërtuar një vend të ri", ka shkruar në "Twitter" nënpresidenti rajonal i Katalonjës, Oriol Junqueras.