Rajoy: Do të parandalojmë keqpërdorimin e Katalonjës

Pasi Senati mbështeti përdorimin e nenit 155 të Kushtetutës së Spanjës, qeveria qendrore mund të lëvizë me shpejtësi për të hequr nga detyra Presidentin rajonal katalanas, të pezullojë ministrat e tij dhe të marrë autoritet mbi mediat publike, policinë dhe financat e rajonit. Kryeministri Mariano Rajoy i tha Senatit se qeveria e tij kishte provuar në mënyrë të përsëritur të frenonte separatistët në Katalonjë. Ai komentoi edhe ofertat e Puigdemont për dialog për t'i dhënë fund bllokimit. "Fjala dialog është një fjalë e bukur. Ajo krijon ndjenja të mira, por dialogu ka dy armiq: ata që abuzojnë, injorojnë dhe harrojnë ligjet, dhe ata që vetëm duan të dëgjojnë veten, të cilët nuk duan ta kuptojnë partinë tjetër", tha Rajoy. Ai tha se neni 155 duhej për të "parandaluar keqpërdorimin e Katalonjës". "Katalanasit duhet të mbrohen nga një pakicë intolerante që po i jep vetes pronësinë e Katalonjës dhe po përpiqet t'i nënshtrojë të gjithë katalanasit në zgjedhën e doktrinës së vet", u shpreh Rajoy. Edhe partitë e tjera spanjolle folën kundër deklaratës së Katalonjës. Pedro Sanchez, kreu i Partisë Socialiste spanjolle, tha se pavarësisht nga mosmarrëveshjet e tij me qeverinë e Rajoy, përballë sfidës së integritetit territorial të Spanjës, nuk mund të ketë nuanca. Spanja pa Katalonjën dhe Katalonja pa Spanjën janë të gjymtuara. Pablo Iglesias, kreu i partisë kombëtare të krahut të majtë Podemos, i cili mbrojti të drejtën e votës së Katalonjës, e kritikoi shpalljen e pavarësisë. "Referendumi i 1 tetorit ishte i rëndësishëm, por nuk u jep atyre të drejtën për të shpallur pavarësinë", tha ai.