15 vjet “News 24”, festa madhështore e ekranit kampion bën bashkë elitën shqiptare

Televizioni i parë informativ shqiptar mbushi 15 vjeç pak ditë më parë. Kishte shumë arsye për ta festuar këtë ditë, ashtu siç e meritonte, në mënyrë madhështore! “News 24” për gjatë gjithë këtyre viteve ka bërë një rrugëtim dinjitoz në kërkim të perfeksionimit dhe si gjithmonë në garë me veten, sepse standardet e tij e bëjnë të pakonkurrueshëm me ekranet e tjera informative shqiptare. Një histori suksesi e drejtuar me profesionalizëm dhe me ambicien për të qenë gjithmonë i pari te lajmi dhe për ta dhënë atë me vërtetësi, “News 24” mblodhi politikanë të të gjithë krahëve, intelektualë, përfaqësues të klerit, por dhe përfaqësues të trupit diplomatik të akredituar në Shqipëri. I ndjekur tashmë edhe në platformat dixhitale përtej kufijve, “News 24” është bërë dritarja e shqiptarëve në të gjithë rajonin. Të pranishëm në festën gala ishin Presidenti Ilir Meta, kryeparlamentari Gramoz Ruçi, zv. kryeministri i qeverisë së Kosovës dhe njëkohësisht ministër i Jashtëm, Behgjet Pacolli, kryetari i Parlamentit të Maqedonisë, Talat Xhaferri, Sekretari i Përgjithshëm i Qeverisë së Maqedonisë, Dragisha Ravshovski, kryetari i Bashkisë së Ulqinit, Nazif Cungu dhe disa ministra. Nuk i munguan festën së djeshme të televizionit më të madh informativ guvernatori i Bankës së Shqipërisë, Gent Sejko, kreu i KLSH- së Bujar Leskaj, rektori i Kolegjit Universitar “Luarasi” Arben Malaj, moderatorët e njohur Blendi Fevziu, Ardit Gjebrea etj. Si në çdo event tjetër që organizohet nga “Focus Group” apo edhe nga biznese të tjera të familjes Hysenbelliu, detajet e festës si dhe skenogafia e Pallatit të Kongreseve ishin të kuruara deri në perfeksion. Tortën festive, të kompozuar me 5 kate e ku në çdo kat ishin stampuar foto nga kronikat dhe titrat e para të televizionit, e preu Fatmir Hysenbelliu, zv. presidenti i “Hysenbelliu Group”. Përmes muzikës festive dhe fishekzjarrëve, të pranishmit uruan drejtuesit dhe presidencën e grupit për suksese të reja në sfidat e informimit të publikut.

Për arsye të një udhëtimi pune në Emiratet e Bashkuara Arabe, Kryeministri Edi Rama nuk mundi të ishte në ceremoninë e “News 24”. Megjithatë, ai kishte gjetur mënyrën për t’u bërë pjesë e festës, madje duke marrë më shumë protagonizëm se sa po të ishte fizikisht. Ai dërgoi një video- mesazh përshëndetës ku, ndër të tjera, thoshte: “Në pamundësi për të qenë fizikisht në festën e ditëlindjes së ‘ News 24’, dëshiroj të shpreh një vlerësim të sinqertë për rrugëtimin e këtij televizioni. Deri më sot është si një dritare informacioni, si një dritare debati, si një dritare ku, pavarësisht se mund t’i shquash edhe ato tipare karakteristike të mediave në tërësi, nuk ndjek një axhendë të parashkruar për t’u bërë palë me dikë apo e dikujt; apo për të nxjerrë përfitime të drejtpërdrejta përmes keqpërdorimit të informacionit, të lajmit, axhendës dhe debatit. ‘ News 24’ është i mbarë dhe i uroj rrugë të gjatë dhe 15vjetor të lumtur”, tha Rama.