Basha: Prefektët e rinj do e shohin veten si shërbëtorë të Habilajve

Shkarkimi i 12 prefektëve dhe zëvendësimi i tyre me 12 ish- ushtarakë, sipas kreut të PD, Lulzim Basha, bëhet nga kryeministri për të tërhequr vëmendjen nga skandali “Tahiri”. Në një reagim për mediat, Basha theksoi se 12 prefektët e rinj do të jenë 12 anëtarët e rinj të bandës që do të vihen në shërbim të Kryeministrit Edi Rama. “Llustraxhiu doli sot me 12 shërbëtorë të rinj, në një përpjekje të dëshpëruar për ta çuar vëmendjen diku tjetër, i zënë siç është nga skandali i madh i narkoshtetit. Po ç’lidhje kanë ca të emëruar, që as nuk do të marrin frymë pa lejen e tij, kur pushtetin e vërtetë ai e ndan me kupolën mafioze e me oligarkët e tenderave. Siç janë punët, 12 prefektët janë 12 anëtarët e rinj të bandës. Ndoshta ka prej tyre që nuk janë nisur me atë qëllim, por shpejt do ta shohin veten si noterë e shërbëtorë të Habilajve e familjeve mafioze që janë realisht prefektët e Edi Ramës në 12 qarqet e vendit”, deklaroi Basha. Qëndrimin e kreut të opozitës në lidhje me prefektët e rinj e përforcoi edhe deputeti demokrat, Flamur Noka, i cili deklaroi se të paktën dy nga prefektët janë shpërblyer për lejimin e trafikut të drogës. Nënkryetari i Komisionit të Sigurisë Kombëtare ka deklaruar se drejtori dhe nëndrejtori i qendrës së radarëve janë shpërblyer me poste si prefekt nga Edi Rama. “Maks Malaj drejtor i QNOD dhe Astrit Alia nëndrejtori i QNOD ( qendrës së radarëve) sot u shpërblyen prefekt në Fier dhe Gjirokastër. Pse??? Shpërblim për të mbyllur gojën për trafikun e drogës. Omerta- funksionon. Mbyll gojën të shpërblehesh, kodi i Ramës”, deklaroi deputeti i PD.