Rama ia dorëzon qarqet Ushtrisë, emëron prefektë gjeneralë dhe kolonelë
Kryeministri: Institucion që mbeti në hije, në një pozicion letargjik, kërkojmë një profil të ri të figurës së prefektit
Gjeneralë dhe kolonelë në rezervë do të drejtojnë 12 prefekturat e vendit. Në mbledhjen e djeshme të qeverisë, me një lëvizje surprizë, si asnjëherë më parë, Kryeministri vendosi të emërojë ushtarakë në lirim për të ndryshuar totalisht profilin e drejtuesit të qarkut.
Në një periudhë që qeveria kaloi në një proces strukturimi e më pas administrata dhe agjencitë e ndryshme, tani vjen radha e qarqeve për të cilat Kryeministri Rama tha se “prefekti ishte një pozicion që ishte letargjik dhe dukej vetëm kur kishte përmbytje”. Pasi shkarkoi të 12 prefektët aktualë, Kryeministri bëri edhe prezantimin e tyre pas mbledhjes së qeverisë bashkë me prefektët e rinj. Në krye të Prefekturës së Tiranës, kreu i qeverisë emëroi Suzana Jahollarin, të parën kolonele në historinë e Forcave të Armatosura, kolonele në rezervë, komandante e Akademisë së Nënoficerëve “Tomson”, drejtore e Drejtorisë së Inspektimit në Ministrinë e Mbrojtjes, me kualifikime në Holandë dhe SHBA. Në qarkun e Kukësit, Zenel Kuçanën, kolonel në rezervë; në Dibër Nexhmedin Shehun, kolonel në rezervë; në Shkodër Çesk Milljen, kolonel në rezervë; në Lezhë Gjergj Prendin, major në rezervë; në Durrës Bektash Petoshafin, kapiten i Forcave Detare; në Elbasan Maksim Malaj, gjeneralmajor në rezervë; në Fier Baki Bala, kolonel në rezervë; në Berat Harilla Dafa, kapiten i rangut të parë në Forcat Detare në rezervë; në Vlorë Flamur Mamaj, arsim ushtarak, shërbyer për një kohë të gjatë në FA; në Korçë Dhori Spirollari, gjeneral brigade dhe në Gjirokastër Astrit Aliaj, kapiten i parë i Forcave Detare në rezervë.
MOTIVACIONI Kryeministri Rama shpjegoi gjatë konferencës për mediat qëllimin e emërimit të ish- ushtarakëve të lartë në krye të administrimit të qarqeve. “Jemi në një fazë të re të procesit qeverisës, pas një sërë reformash, ndër të cilat reforma rrënjësore administrativo- territoriale, që shënoi çeljen e një kapitulli të ri për nivelin e dytë qeverisës, por edhe për shtetbërjen në Shqipëri. Njëkohësisht jemi në çeljen e një faze të re qeverisëse me disa sfida themelore, për të cilat lipset, ndër shumë të tjera, edhe një institucion i Prefektit i ridimensionuar tërësisht, si një institucion përfaqësues i Kryeministrit dhe i qeverisë në çdo qark”, u shpreh Rama. Ai citoi dhe disa cilësi se përse preferoi ushtarakë dhe jo civilë për postin e prefektit. “Kemi vlerësuar 12 prefektët e rinj për përgjegjësinë për shërbim publik pa kushte, për formimin e tyre të lartë profesional dhe për lidershipin e tyre. Po ashtu, edhe për aftësitë menaxhuese dhe ekzekutuese në një karrierë ku ata kanë qenë të përfshirë në sfida të rëndësishme dhe në detyra brenda apo jashtë vendit, për eksperiencën e gjatë në drejtim, si dhe për një eksperiencë të çmuar që ata sjellin edhe në një fushë që vit pas viti po bëhet gjithmonë e më sensitive e më prioritare, siç janë Emergjencat Civile”, tha Rama. Sipas tij ata do të jenë vëzhgues të të gjithë veprimtarisë së administratës shtetërore në raport me publikun, në funksion të një shërbimi gjithmonë e më të mirë ndaj tij dhe të luftës ndaj korrupsionit.