Shoqatat e ushtarakëve vlerësojnë vendimin e Kryeministrit
Pavarësisht se nuk kanë qenë në dijeni, për shoqatat e ushtarakëve vendimi i Qeverisë për emërimin e 12 prefektëve të rinj që vijnë nga radhët e ushtarakëve është një lajm i mirë, i cili duhet përshëndetur. Të kontaktuar nga gazeta, kreu i Shoqatës Kombëtare të Ushtarakëve në Rezervë, Thoma Konduri, kreu i shoqatës Aleanca Kombëtare e Ushtarakëve të Shqipërisë, Kujtim Çako, si edhe kreu i Shoqatës së Ushtarakëve të Xhenios, i cili drejtoi edhe grupin e punës për bashkimin e ushtarakëve, Aleksandër Mihali, pohuan se nuk janë vënë në dijeni për këto emërime. Por sipas tyre, një gjë të tillë Kryeministri Rama e kishte premtuar edhe në takimet e mëparshme që kishte zhvilluar, ndaj edhe lajmi i sotëm më shumë se surprizues, ishte përmbushje e një zotimi. Ata e cilësuan vendimin si tejet pozitiv, pasi është provë e një vlerësimi dhe konsiderate në adresë të këtij komuniteti. Përmes një deklaratë për mediat, Konduri vë në dukje se aktivizimi i ushtarakëve është një hap me rëndësi që do të reflektohet ndjeshëm, para së gjithash, në përmirësimin e shërbimit ndaj qytetarëve. “Kolegët tanë që u emëruan sot, por edhe qindra të tjerë, të cilët kanë ndërprerë karrierën aktive, janë pasuri e madhe e vendit, sepse ata janë kapacitete intelektuale, njerëz me përvojë organizuese e drejtuese, të përkushtuar ndaj detyrës, figura të pastra moralisht, të sakrificës dhe të edukuar me disiplinën e punës. Aktivizim nga qeveria i këtyre kapaciteteve do të rrisë nivelin e shërbimit ndaj popullit. Administrata do të marrë rrugën e kërkuar nga populli”, ka vënë në dukje kryetari i Shoqatës Kombëtare të Ushtarakëve në Rezervë. Sipas tij, ky hap nuk duhet të jetë i vetmi, por duhet të pasohet edhe nga të tjerë, me qëllim riintegrimin e ushtarakëve. “Është hera e parë që ushtarakët vlerësohen në këtë mënyrë dhe nivel. Presim dhe shpresojmë që ky fillim të jetë në programin e çdo qeverie, sikurse ndodh në vendet e zhvilluara demokratike, për të vënë në efiçencë kapacitetet që përgatit ushtria, deri në limitet ligjore, në interes të vendit, si dhe duke ndërprerë papunësinë e intelektualëve. Çmojmë dhe falënderojmë shumë Qeverinë për këtë akt të lartë vlerësimi ndaj ushtarakëve të vendit tonë”, mbyll deklaratën Konduri. Për shumëkënd, emërimet e reja të kryeministrit u lexuan si një ftesë për paqe, në kushtet kur përballjet mes Qeverisë dhe ushtarakëve kanë përfunduar gjithmonë në dyert e gjykatës. Prej muajt shtator në Kushtetuese është depozituar padia kundër vendimit unifikues të Kolegjeve të Bashkuara të Gjykatës së Lartë. Ushtarakët kanë paralajmëruar dërgimin e çështjes në Strasburg nëse Kushtetuesja shprehet kundër tyre. Mbetet për t’u parë qëndrimi që ato do të mbajnë pas hapit të hedhur nga Kryeministri Rama.