Moisi Habilaj, sot sërish para Gjykatës së Katanias
Moisi Habilaj, i konsideruar si kreu i grupit që trafikonte drogë nga Shqipëria në drejtim të Italisë, do të dalë ditën e sotme për herë të dytë brenda kësaj jave para Gjykatës së Katanias, për të mësuar në lidhje me kërkesën që ka depozituar në Gjykatë për rivlerësim të masës së sigurisë. Ai është lënë në arrest me burg nga Gjykata e Katanias, së bashku me 6 bashkëpunëtorë të tij. Mirëpo, Moisi Habilaj pretendon të lirohet ose të marrë një masë më të butë. Deri më tani, ai nuk ka pranuar asnjë prej akuzave, si trafik ndërkombëtar droge, krijim i organizatave kriminale dhe mbajtje pa leje të armëve dhe municioneve. Vetë avokati i tij ka thënë dy ditë më parë se pretendon që të marrë një masë më të lehtë sigurie për klientin e tij, duke shtuar se për ish- ministrin e Brendshëm, Saimir Tahiri, nuk ka lexuar asnjë rresht në dosjen voluminoze ndaj grupit të Habilajve. Moisi Habilaj ka lidhje të largëta familjeje me ish- ministrin e Brendshëm, Saimir Tahiri. Ky i fundit ka pranuar se të vetmin kontakt me të e ka pasur në shitjen e mjetit të tij tip “Audi”, transaksion ky i kryer jo në mënyrë ligjore. Që nga zbulimi i këtij veprimi, ka pasur shumë akuza ndaj ish- ministrit, se mjeti i tij është përdorur për trafik droge, qoftë me dijeninë apo pa dijeninë e tij. Vetë ish- ministri nuk e ka pranuar për asnjë moment përfshirjen në trafik. Ndërkohë, sipas një dokumenti të publikuar nga Prokuroria e Katanias, grupi i Habilajve dyshohet se ka përfituar një shumë prej 20 milionë eurosh nga trafiku i drogës. Kjo e fundit kultivohej në Shqipëri dhe transportohej drejt vendit fqinj me gomone. Habilajt, sipas Prokurorisë së Katanias, kontrollonin të gjithë rrjetin e trafikut të drogës në Jug të Italisë.