Tri operacione antidrogë në Tiranë e Përmet, 5 në pranga
Kosovari me drogë në autobus, 2 të tjerë e shoqëronin me makinë
Tri operacione antidrogë janë zhvilluar në Tiranë e Përmet gjatë ditës së djeshme, duke vënë në pranga 5 persona e sekuestruar 34 kg kanabis.
Rezultatet e këtyre operacioneve u bënë publike dje nga drejtori për Krimet në Policinë e Shtetit, Josif Shtëmbari, gjatë një konference për shtyp. “Gjatë 12 orëve të fundit janë zhvilluar 3 operacione antidrogë, ku janë sekuestruar 34.1 kilogramë lëndë narkotike e dyshuar kanabis sativa, 2.8 gramë lëndë narkotike e dyshuar kokainë, si dhe një armë zjarri pistoletë, e tipit ‘ Zastava’”, tha drejtori Shtëmbari. Sipas tij, operacioni i parë ishte zhvilluar në dalje të Tiranës, në afërsi të Tapizës, i dyti në Përmet, në vendin e quajtur “Përroi i Gropëzit”, dhe i treti po në kryeqytet, ku një 30- vjeçar u arrestua me kokainë dhe pistoletë. Paralelisht me operacionet e Antidrogës së dy qyteteve, Shtëmbari tha se është zhvilluar edhe një tjetër operacion, gjatë të cilët është goditur një grup që realizonte vjedhje makinash. OPERACIONI NE TAPIZE
Tentativa e tre të rinjve kosovarë për të trafikuar hashash nga Tirana në drejtim të Kosovës ka dështuar dje, pasi Policia ka bërë të mundur arrestimin e tyre dhe sekuestrimin e sasisë së lëndës narkotike. Burime nga Policia thanë se një sasi droge, prej 4.1 kg hashash, ishte fshehur në një çantë rrobash, të cilën e mbante një 19- vjeçar. Ky i fundit kishte hipur në një autobus në Tiranë dhe po udhëtonte drejt Kosovës, me qëllim trafikimin e drogës. Ndërsa dy shokët e tij udhëtonin me një makinë të marrë me qira, duke ndjekur pas autobusin, në mënyrë që të lajmëronin mikun e tyre për ndonjë situatë të dyshimtë. Policia tha se në Tapizë, në bazë të informacioneve të marra në rrugë op- erative, është bërë kontrolli e më pas arrestimi i shtetasit Astrit Voca, 19 vjeç, lindur dhe banues në Kosovë. Nga kontrolli i ushtruar iu sekuestruan në cilësinë e provës materiale 4.1 kg kanabis sativa. Droga ishte e presuar në katër pako. Astrit Vocës iu gjet edhe një kartë identiteti e falsifikuar. Nga hetimet e kryera u identifikuan dhe arrestuan bashkëpunëtorët e tij në këtë veprimtari të kundërligjshme, Burim B., 34 vjeç dhe Shukri S., 23 vjeç, lindur dhe banues në Kosovë. Këta dy shtetas kishin marrë me qira një automjet të markës “Volkswagen”, me targa të Kosovës dhe po ndiqnin shtetasin Astrit Voca për t’i krijuar siguri gjatë kohës që do të udhëtonte me autobus për në Kosovë. OPERACIONI NE PERMET
Drejtori për Krimet në Policinë e Shtetit, Josif Shtëmbari, tha dje se një tjetër operacion antidrogë ishte zhvilluar në Përmet. Ai deklaroi se mbi bazën e informacioneve të marra në rrugë policore, nga kontrolli i ushtruar në banesën e shtetasit Veis Pipa, në fshatin Panarit, u gjet një qese me lëndë të dyshuar kanabis sativa. Në afërsi të banesës, në vendin e quajtur “Përroi i Gropëzit”, u gjetën të hedhura në një ambient të hapur 4 thasë plastmasi, me ngjyrë të zezë, brenda të cilëve kishte kanabis sativa. Pesha totale e lëndës rezultoi 30 kg. Specialistët e Hetimit të Narkotikëve të Policisë së Përmetit arrestuan në flagrancë shtetasin Veis Pipa, 33 vjeç, me akuzën “prodhim dhe shitje të lëndëve narkotike”.