Goditet grupi, vidhnin automjete në Tiranë dhe i shisnin në Dibër
Policia e Tiranës finalizoi dje operacionin e koduar “Kamionçina”, gjatë të cilit u godit një grup me veprimtari kriminale në fushën e vjedhjes së automjeteve. Drejtori për Krimet në Policinë e Shtetit, Josif Shtëmbari, tha dje se specialistët për Hetimin e Krimit në Komisariatin nr. 4 të Tiranës, si rezultat i një pune policore disamujore, zbuluan dhe dokumentuan me prova ligjore veprimtarinë e grupit kriminal që vidhnin automjete dhe më pas i çmontonin për pjesë këmbimi. Mjetet vidheshin në Tiranë dhe më pas dërgoheshin në një servis në fshatin Blliçe të Peshkopisë. Në bashkëpunim me Policinë e Dibrës u arrestuan 4 persona dhe u shpall në kërkim 1 tjetër. Të arrestuarit janë Ferit Dauti, 44 vjeç, banues në Blliçe, Dibër, i dënuar më parë; Mehmet Dauti, 20 vjeç, banues në Blliçe; Ervis Dauti, 19 vjeç, banues në Blliçe dhe Hasan Elezaj, 49 vjeç, banues në Tiranë, i dënuar më parë. Në servisin e shtetasit Ferit Dauti, në Peshkopi, u gjetën dhe u sekuestruan në cilësinë e provës materiale 3 mjete dhe pjesë të disa makinave të tjera. Në sajë të punës hetimore u dokumentua me prova ligjore se këta shtetas janë autorë të 5 ngjarjeve të ndodhura në Tiranë. Dyshohet se më 3 mars, gjatë natës, në rrugën “Sitki Çiço” kanë vjedhur mjetin tip “Benz”; më 13 gusht, në rrugën “Arkitekt Sinani”, kanë vjedhur mjetin tip “Benz”; më 7 shtator, në rrugën “Selman Riza”, kanë vjedhur mjeti furgon tip “Benz”; më 23 tetor, në rrugën “Myslym Keta”, kanë vjedhur mjetin furgon tip “Benz”; Më 23 tetor kanë vjedhur automjetin tip kamionçinë “MercedesBenz”. “Policia e Shtetit vijon punën për kontrollin e territorit, parandalimin e ngjarjeve kriminale dhe goditjen e paligjsh- mërisë, e në këtë kuadër fton qytetarët të telefonojnë falas në numrat 112 dhe 129, kur konstatojnë paligjshmëri, duke i garantuar për reagim të shpejtë dhe të paanshëm”, u shpreh dje gjatë konferencës për shtyp drejtori Shtëmbari.