Daja: Duam tri pikët, na lini të luajmë futboll

"Shpresoj të mos kemi probleme, e njohim kundërshtarin"

Trajneri Daja do të ketë shansin që të ketë në dispozicion të gjithë futbollistët para kësaj ndeshjeje.

Mirëpo, në fjalën e tij gjatë konferencës për shtyp në Beograd para ndeshjes, tekniku i korçarëve ka bërë me dije se futbollistët që vijnë nga dëmtimet nuk kanë formën e tyre optimale. Në deklaratën e tij, Daja ka theksuar se pret nga serbët të njëjtën mundësi për të luajtur futboll dhe për të shmangur çfarëdo aspekti tjetër që e shoqëron këtë përballje.

Si e shihni përballjen me kundërshtarin?

Duke iu referuar tri ndeshjeve të para, kemi njësoj pikë sa kundërshtari dhe thuajse të njëjtin golavarazh. Nisur nga ndeshja e fundit në Elbasan, pavarësisht vlerave që ka ekipi kundërshtar, vumë re që nuk ishim inferiorë. E dimë që është shumë e vështirë, por do të futemi në fushë për rezultat pozitiv.

Si mendoni se do të ndikojë prania e tifozërisë serbe?

Duke pasur mbështetjen e tifozëve të tyre, ata do të kërkojnë që patjetër ta fitojnë këtë përballje. Kjo bën që nga njëra anë t'u shtohet doza e motivimit, por ana tjetër e medaljes është që ngarkesa kalon tek ekipi kundërshtar. Ekipi që kërkon patjetër fitoren, ka ngarkesë emocionale. Kemi njohje për ekipin kundërshtar. Është e vështirë, por nuk mendoj se është e pamundur që t'i menaxhojmë drejt emocionet.

Si do të luajë Skënderbeu në raport me ndeshjen e fundit?

Ata do të kërkojnë që të jenë më agresivë, nëse mund ta them si fjalë, në aspektin sportiv. Uroj që të përballojmë presionin, të cilin kundërshtari do ta shfrytëzojë në këtë ndeshje.

Si është gjendja e skuadrës, a keni lojtarë në dyshim?

Kemi lojtarë që vijnë nga dëmtimi dhe që nuk kanë gjendje optimale. Kjo është diçka që i trembemi. Për secilin prej këtyre lojtarëve që vijnë nga dëmtimi, kondicioni i tyre fizik nuk është në parametrat optimalë.

Ngjarjet e të shkuarës, a mendoni se do të ndikojnë?

Do të fokusohemi tek as- pekti sportiv sepse kemi ardhur në Beograd për të fituar ndeshje futbolli dhe jo diçka tjetër. Shpresoj që të na kthejnë atë lloj qetësie që i kemi dhënë secilit kundërshtar në Elbasan, edhe vetë Partizanit të Beogradit. Uroj që të flasë vetëm futbolli.

I keni të gjithë të gatshëm, a keni vështirësi në zgjedhje?

Pothuajse i gjithë kontingjenti është në dispozicion, për herë të parë që nga fillimi. Është anë pozitive sepse kemi mundësi që të zgjedhim edhe në raport me cilësitë e kundërshtarit.

Do guxoni që të arrini fitoren, ashtu si 30 vite më parë bëri një ekip shqiptar, duke u kualifikuar në Beograd?

Po përgjigjem unë, meqë për të bërë krahasimin duhen disa faktorë edhe për faktin se Mici ka qenë… në projekt në atë kohë ( qesh…). Ka qenë përballje e vështirë edhe në atë kohë. Nuk ka ngjashmëri, pasi dinamika prej 30 vitesh i bën të ndryshme të dyja ekipet. Shpresoj që të na ndjekë ajo pjesë e fatit. Pse jo, ta përsëritim. Ne jemi të ndërgjegjshëm që ndeshja është shumë e vështirë, edhe prej meritave të kundërshtarit që është me gjithë mend shumë i fortë, sidomos në fushën e tij.