SKEMA E NDARJES Pronat, Qeveria rrit fondin e kompensimit
Zbardhen fondet që shkojnë për kompensimin e ish- pronarëve. Qeveria nis zbatimin e paketës së re. Rritja graduale deri në 50 milionë USD në vit
Plani i pagesave në adresë të pronarëve të shpronësuar u bë konkret që me zyrtarizimin e ligjit të ri, por ndryshe nga sa ishte përcaktuar, qeveria vendos të tregohet më dorëlëshuar.
Në vitin e 4- t të zbatimit të skemës së re, fondi që do të vendoset në dispozicion do të jetë më i lartë nga ai që ishte parashikuar në projeksionin fillestar. Lajmin e dha dje në Komisionin e Ekonomisë kreu i Financave, Arben Ahmetaj, sipas të cilit për vitin 2019 fondi vjetor do të jetë 5 miliardë lekë apo, thënë ndryshe, 50 milionë dollarë. Ndërkohë që në ligj vlera e përcaktuar ishte 4.1 miliardë lekë. “Në 2019- n do të përdoren 50 milionë dollarë për ish- pronarët, fondi do të rritet. Për 2018- n do të përdorim 4 miliardë lekë apo 40 milionë dollarë”, tha kreu i Financave.
FONDI
Vit pas viti fondi që i shkëputet buxhetit të shtetit ka ardhur në rritje. E njëjta gjë ka ndodhur edhe me vitin 2018, ku fondi sërish ka njohur rritje, nga 3.8 miliardë që ka qenë këtë vit, do të bëhet 4 miliardë lekë. Qëllimi, sikundër është shprehur edhe në ligjin e ri, është mbyllja e këtij kapitulli brenda 10 viteve. Për ta bërë këtë, Qeveria është angazhuar që brenda kësaj periudhe të nxjerrë nga arka 50 miliardë lekë. Por, sërish vlera e programuar është e pamjaftueshme për kompensimin e plotë të 26 mijë pronarëve, që kanë në duar vendime të formës së prerë. Kompensimi mbi bazën e zërit kadastral që prona ka pasur në momentin e konfiskimit, redukton masën e përfitimit, por sërish fatura mbetet e lartë për financat. Mbi bazën e një vlerësimi paraprak, të dalë nga një raport sekret i Agjencisë së Trajtimit të Pronave, nevojiten jo pak, por 200 miliardë lekë për t’i shkuar në fund kësaj odiseje. Shteti ka marrë përsipër ¼ - n e kësaj vlere dhe synon që pjesën e mbetur ta mbushë me shitjen në ankand të sipërfaqes së tokës bujqësore që ka në dispozicion.
APLIKIMET
Sipas formulës së re, të parët që kanë mundësi të kompensohen janë pronarët me vendime të para ’ 95- s, për të cilët ka përfunduar edhe vlerësimi financiar. Prej muajsh ka nisur vlerësimi edhe për dosjet e ’ 96- s, por ende nuk ka asnjë informacion zyrtar mbi shpalljen e listave përfituese. Pas publikimit të tyre lind edhe e drejta për aplikim. Veç kompensimit në të holla, është edhe skema e kompensimit fizik. ATP ka në dispozicion 23 mijë ha tokë bujqësore, e cila sipas ligjit do të ndahet me ankand, nga ku ofertuesi më i mirë do të shpallet edhe fitues.