Rama i preu fondet, Beqiraj te Meta: Dorëhiqem nga Akademia
“Ma kërkoi kreu i shtetit, dorëheqja për t’i hapur rrugën reformimit të Akademisë”
Gudar Beqiraj, kryetari i ri i zgjedhur i Akademisë së Shkencave, ka deklaruar dorëheqjen e tij pas një takimi me Presidentin e Republikës, Ilir Meta.
Dy muaj pas zgjedhjes së tij në krye të Akademisë së Shkencave, në një proces të kontestuar si nga akademikë, por dhe nga Kryeministri Rama, Beqiraj ka marrë një ftesë nga kreu i shtetit për t’u takuar në Presidencë. Mësohet se biseda mes miqve të vjetër ka qenë drejt gjetjes së një zgjidhjeje për të zhbllokuar funksionimin e Akademisë. Presidenti Meta mësohet të jetë shprehur se në këtë situatë ku ndodhet Akademia, ai e ka të pamundur ta dekretojë atë kryetar. Nga ana e tij, Beqiraj ka pranuar propozimin e kreut të shtetit për të dhënë dorëheqjen, si zgjidhjen më të favorshme në këtë situatë për t’i hapur rrugën reformimit të saj. Në 27 tetor, në një shkrim të saj, gazeta “Panorama” publikoi lajmin se Presidenti i Republikës nuk do ta dekretonte Beqirajn në krye të Akademisë pas reagimeve të shumta që pati për këto zgjedhje.
PRESIDENCA Përmes një njoftimi zyrtar, zyra e shtypit e Presidentit Meta njoftoi dorëheqjen e Gudar Beqirajt, por dhe frymën e këtij takimi. “Presidenti i Republikës së Shqipërisë priti sot në takim Kryetarin e Zgjedhur të Akademisë së Shkencave, akademikun Gudar Beqiraj, gjatë të cilit u diskutua mbi situatën aktuale të Akademisë së Shkencave, procesin e reformimit të saj dhe sfidat dhe perspektivën e përballjes së tyre me sukses. Gjatë bisedës u nënvizua nevoja dhe rëndësia e një reformimi tërësor të kërkimit shkencor dhe Akademisë së Shkencave në drejtim të rritjes së produktivitetit shkencor në harmoni me zhvillimet e sotme të shkencës, teknologjisë dhe inovacionit, për përballimin e sfidave të rëndësishme të vendit tonë”, thuhet në njoftim. Në vijim, njoftimi jep dhe vendimin e kryetarit të Akademisë për të mos qenë në krye të këtij institucio- ni. “Gjatë takimit, Akademiku Beqiraj i shprehu vullnetin e tij Presidentit të Republikës për t’u dorëhequr nga pozicioni i Kryetarit të Zgjedhur të Akademisë së Shkencave, duke theksuar se ai do të mbetet përkrah kolegëve të tij akademikë, mbështetës dhe kontribues i procesit të reformimit të nisur tashmë të këtij institucioni të rëndësishëm. Presidenti i Republikës Meta vlerësoi lart aktin qytetar të akademikut Gudar Beqiraj, duke vënë në dukje personalitetin e tij dhe rolin e kontributin e gjatë jo vetëm në fushën e kërkimit shkencor, por edhe në atë të zhvillimit të sportit dhe të veprimtarive humanitare”, thuhet në njoftimin e Presidencës. Gjithashtu, Presidenti i Republikës Meta theksoi rëndësinë e vendosjes sa më shpejt të dialogut mes Asamblesë së Akademisë së Shkencave dhe qeverisë, me qëllim rritjen e rolit të pazëvendësueshëm të saj për zhvillimin e vendit. Kundërshtar i hapur i procesit zgjedhor në Akademinë e Shkencave ishte edhe Kryeministri Rama, i cili paralajmëroi se nëse Akademia nuk anulon votimin për kryetarin dhe nuk reformohet, nuk do të marrë fonde nga qeveria. Në një nga mbledhjet e qeverisë, Kryeministri Rama tha se nuk do të ketë buxhet për Akademinë, por vetëm për Institutin e Albanologjisë.