PD e LSI bashkojnë votat, rrëzohen taksat e reja
Debate në mbledhjen e Këshillit, rrëzohet paketa fiskale
Partia Demokratike dhe Lëvizja Socialiste për Integrim kanë bërë bashkë votat në Këshillin Bashkiak në Durrës, duke rrëzuar paketën fiskale.
Kjo paketë kishte ardhur si propozim i këshilltarëve të PS- së, por nuk ka gjetur aprovimin e opozitës. Që në fillim të diskutimeve, këshilltarët e PD- së ua bënë të qartë drejtuesve të bashkisë që të marrin në konsideratë propozimet e tyre ose të hedhin në votim ato, çka nënkuptonte se dy partitë kishin shumicën në 40 këshilltarët e pranishëm në mbledhjen e radhës. 19 këshilltarë pro, 1 abstenim dhe 20 kundër, nuk mjaftuan që të vihej në zbatim paketa e re fiskale, ndonëse ajo nuk parashikonte rritje të tarifave. Në këtë zhvillim të ri, duket se edhe PS- ja është dorëzuar përballë realitetit të ri, pasi kreu i Bashkisë, Vangjush Dako, e ka pranuar në heshtje rrëzimin e paktës fiskale. Fjalën i pari e mori Alfred Mullaraj, kryetar i Komisionit të Ekonomisë ( këshilltar i PS), i cili tha se paketa është në të njëjtin nivel, madje në disa pika tarifat janë ulur. “Paketa fiskale për vitin 2018, e përgatitur nga ana e Bashkisë Durrës, është në të njëjtin nivel me vitin e kaluar, madje për zëra të veçantë, Bashkia ka propozuar reduktimin e tyre. Bashkia ka ruajtur të njëjti nivel taksash, madje për tarifën e pastrimit, në zonat e fshatit ku nuk ofrohet ky shërbim, qytetarët nuk do të taksohen. Ulje ka pasur në këtë paketë edhe për pagesën e tarifës për çerdhe dhe kopshte, ku bashkia kishte propozuar që familjet me ndihmë ekonomike të paguajnë vetëm 10 për qind të faturës dhe ato me shumë fëmijë 20- 30 për qind”, tha Mullaraj. Nga ana tjetër, këshilltarët e PD dhe LSI kërkuan që disa tarifa, si: pastrimi, ndriçimi, gjelbërimi, taksa e banesës, taksA e parkimit, taksa e tregjeve etj, të ulen, ndërsa një pjesë tjetër të bëhen zero. Këshilltarët e opozitës, Shkëlqim Fortuzi dhe Armand Teliti, propozuan që të mos rritet tarifa e plazheve private, në zonën e fshatit të hiqet fare tarifa e parkimeve, jo vetëm në zonat e cilësuar si qendra të këtyre njësive, si dhe rishikim të taksës fikse për banesat private. “Propozojmë që tarifa e plazheve të mos rritet, në zonën e fshatit të hiqet fare tarifa e parkimeve, jo vetëm në zonat e cilësuara si qendra të këtyre njësive dhe kërkojmë rishikim të taksës fikse për banesat”, tha Teliti. Këto propozime nuk u morën parasysh dhe në këtë mënyrë, është hedhur në votim projektven- dimi i bashkisë, i cili u rrëzua me 20 vota të këshilltarëve të PD dhe LSI, ndërsa 19 këshilltarë të PS votuan pro, ndërsa një këshilltar abstenoi. Tashmë pritet që propozimet të shqyrtohen nga komisionet përkatëse, derisa të zhvillohet mbledhja e radhës së Këshillit Bashkiak. Në rendin e ditës, për këtë mbledhje të Këshillit Bashkiak Durrës ishin parashikuar 17 pika, të cilat u kaluan në furmë unanime. E vetmja pikë që u rrëzua me fuqinë e kartonit, ishte paketa fiskale për vitin 2018, me ndryshimet e propozuara nga Bashkia Durrës për taksat dhe tarifat vendore.