Historia e 150 misionarëve britanikë, porosia e Çurçillit për Shqipërinë
Ndihma e Londrës me 30 milionë sterlina dhe mbështetja me armatime e logjistikë u përfitua vetëm nga komunistët
Në valën e debateve të shpeshta për Luftën Antifashiste, studiuesi Erald Kapri, ish- gazetar i "Panoramës", ka botuar së fundi librin "Sekretet e luftës- Shqipëria tjetër në dokumentet britanike", botim i Istitutit të Studimeve Historike "Lumo Skëndo". Në ceremoninë promovuese që u organizua mbrëmë në Tiranë, përveç studiuesve, historianëve, akademikëve e veteranëve të luftës, ishte i pranishëm ish- presidenti Bujar Nishani, kryetari i Partisë Demokratike, Lulzim Basha, deputetë e përfaqësues të partive politike etj. Për vlerat e librit foli profesor Uran Butka, profesor Romeo Gurakuqi, studiuesi Ardi Bido, deputeti Agron Shehaj, etj. Libri "Sekretet e luftës" është rezultat i një pune 4- vjeçare të studiuesit Erald Kapri nëpërmjet shqyrtimit dhe leximit të dokumentacionit voluminoz në Arkivin britanik, që u përket viteve 1943 dhe 1944, si dhe dokumente për fillimet e regjimit të Enver Hoxhës. Mbi 20 mijë faqe dokumente autentike janë lexuar dhe, mes tyre janë përzgjedhur dokumente që hedhin dritë për disa nga çështjet më të nxehta të luftës, që nga bashkëpunimi me forcat pushtuese të një pjese të elitës shqiptare, e deri te lufta civile. Janë rreth 150 dokumente dhe raporte autentike të përkthyera të plota dhe të vendosura në kontekst, së bashku me fotografi të misionarëve ushtarakë britanikë të SOE. I mbështetur tërësisht në dokumente autentike britanike, autori i librit hedh sadopak dritë në shumë aspekte të panjohura të viteve të zhurmshme të luftës shqiptare dhe mes shqiptarësh.