Balla: “Peshqit e mëdhenj”, prokurorët e çështjes “CEZ”
“Prokurorët falën pa e hetuar Berishën për shpërdorim detyre”
Kreu i Grupit Parlamentar të Partisë Socialiste, Taulant Balla, akuzoi dje Prokurorinë se po kërkon të mbyllë dosjen e privatizimit të CEZ.
Përmes një konference për mediat nga kryesia e Kuvendit, Balla, i shoqëruar nga deputetët Kushi dhe Ndreu, pjesë të Komisionit Hetimor Parlamentar për privatizimin e kompanisë CEZ, tha se prokurorët po e trajtojnë drejtësinë si pazar. “Në informacionin tonë, kjo çështje gjykohet më datë 24 nëntor në Gjykatën e Shkallës së Parë në Tiranë, për mbylljen e këtij procedimi penal. Por të jeni të sigurt që drejtësia e re po vjen dhe këta prokurorë e këta gjyqtarë që kanë vendosur ta kenë aleatë korrupsionin e krimin, këta nuk kanë më vend në Shqipëri.
Doni peshq të mëdhenj? Ja ku i keni!”, tha Balla. Sipas tij, për çështjen “CEZ”, Prokuroria “duhet të kishte marrë deklarimet e personave”, siç ishte vendimi i Kuvendit me 74 vota pro.
“Si ka mundësi që ka prokurorë mendojnë se në vitin 2017 mund të mbyllet afera korruptive pa bërë asnjë hetim. Kush ua ka dhënë këtyre prokurorëve pushtetin, që të sillen me drejtësinë si në pazar”, tha Balla. “Kush janë këta që kanë tagrin të falin pa e hetuar aspak Sali Berishën për shpërdorim të detyrës, mashtrim, refuzim për të dëshmuar, të gjitha këto vepra penale”, shtoi Balla. Duke radhitur një numër të madh ish- ministrash dhe funksionarë të lartë që janë marrë me çështjen e privatizimit të CEZ dhe rregullimit të referencave dhe çmimeve, Balla tha se Prokuroria nuk ka thirrur për ta pyetur as djalin e ishkryeministrit Berisha. “Kush janë këta prokurorë që paskan tagrin të falin dhe pa e hetuar aspak Shkëlzen Sali Berishën, për veprat penale ‘ Refuzimi për të dëshmuar’ dhe ‘ Ushtrimi i ndikimit të paligjshëm ndaj personave që ushtrojnë funksione publike’, të parashikuara nga nenet 245/ 1 dhe 307 të Kodit Penal”, tha Balla.
Si pjesë e Komisionit He- timor Parlamentar, kreu i grupit të PS tha se priste që të thirrej për një deklaratë për raportin që ky komision hartoi. “Sigurisht, nuk kemi pritur kurrë që këtë çështje ta shikonim si një pako dhurate që i dërgohet Prokurorisë në Gjykatë. Ky është një favor i fundit që Prokuroria i bën klasës së politikanëve të korruptuar. Si ka mundësi vallë që ky grup deputetësh dhe një shumice parlamentare me mandat të qartë për zbatimin e Reformës në Drejtësi, nuk vlekan për Prokurorinë shqiptare për të hapur një çështje, as sa dy kriminelë që flasin në telefon me njëritjetrin?! Biseda telefonike e dy kriminelëve vleka më shumë se një raport përfundimtar i një Komisioni He- timor. Një raport që nuk u mor aspak në konsideratë, qoftë edhe për një hetim formal”, tha Balla. Ai solli në vëmendje mediat në Çeki që shkruajnë e flasin, sipas tij, për një aferë të madhe ku është përfshirë një kompani kaq e madhe, e cila ka paguar ryshfet; në Shqipëri Prokuroria thotë: “S’ka prova. Po e mbyllim”.