“Zbardh mbledhjen ku raportoi për kanabisin kreu i SHISH e Tahiri”
Deputetët e PD dhe LSI në Komisionin e Sigurisë Kombëtare kanë bashkuar firmat në një kërkesë drejtuar Presidentit të Republikës, Ilir Meta, për zbardhjen e mbledhjes së Këshillit të Sigurisë, së mbajtur më 11 nëntor 2016. Kërkesa e deputetëve të opozitës vjen pak ditë pas zhvillimit të mbledhjes me dyer të mbyllura në Kuvend me përfaqësuesin e SHISH. Mbledhja e Këshillit të Sigurisë, e zhvilluar në nëntor të vitit 2016, u thirr nga ishPresidenti Nishani, pas shqetësimeve për rritjen e fenomenit të kanabisit në vend. Në cilësinë e sekretit shtetëror, procesverbali i asaj mbledhjeje qëndron në Presidencë i papublikuar për opinionin publik. Për këtë arsye, deputetët e PD dhe LSI në Komisionin e Sigurisë Kombëtare i kanë kërkuar kreut të shtetit, Ilir Meta, të bëjë publike të dhëna të asaj kohe dhe qëndrimet e mbajtura nga titullarët e institucioneve të sigurisë kombëtare. “Është me interes publik, të dimë sot të dhënat e asaj kohe dhe mbi të gjitha angazhimet e marra nga qeveria dhe institucionet në atë mbledhje për luftën ndaj drogës dhe për të bërë një ballafaqim të rezultateve të dhëna”, thuhet në kërkesën drejtuar Metës. Ish- Presidenti Bujar Nishani ishte i pari që kërkoi zbardhjen e asaj mbledhjeje të Këshillit të Sigurisë, pasi, sipas tij, në atë mbledhje ka të dhëna të rëndësishme, me të cilat publiku duhet të njihet. Pak ditë më parë, në një intervistë për mediat, kreu i shtetit, Ilir Meta,, deklaroi se në konsultë edhe me këshilltarët e tij, po gjykon publikimin e dokumentit të zbardhur të mbledhjes së Këshillit të Sigurimit të datës 11 nëntor të vitit 2016. Në atë mbledhje mungonte Kryeministri Rama, por kanë raportuar ishministri i Brendshëm Saimir Tahiri, ish- kreu i SHISH, Visho Ajazi, dhe të tjerë titullarë të institucioneve të sigurisë në vend.