PS refuzon kërkesën e Prokurorisë për para, PD: Po mbroni grupet kriminale

Strazimiri ironi me Finon: Këta duhen vrarë, u bënë këta të kërkojnë arrestimin e Tahirit. Halimi debat me Manjën

Buxheti i Prokurorisë së Përgjithshme ka përplasur dje në Parlament deputetët e opozitës dhe të maxhorancës në Komisionin e Ligjeve. Ndryshe nga seancat e tjera, deputetët e PDsë kanë bërë të ditur se nuk do të largoheshin nga mbledhja, pasi do të kërkonin që institucioneve të Drejtësisë t’u plotësoheshin të gjitha kërkesat për shtim fondesh, në mënyrë që këto të fundit të mos krijonin alibi për mosarrestimin e “peshqve të mëdhenj”. Por diskutimi sërish mori tone politike dhe në këtë seancë nuk munguan qëndrimet politike për rastin ish- ministrit Saimir Tahiri. Sekretari i Përgjithshëm i Prokurorisë së Përgjithshme, Genti Kosumi, kërkoi nga Kuvendi shtimin në total të 58 punonjësve, të cilët do të shpërndahen në të gjitha prokuroritë e vendit. Por, për Bashkim Finon kërkesat e Prokurorisë ishin luks i tepërt. Kaq mjaftoi që demokratët të hidhen në kundërsulm, duke akuzuar shumicën se po pengon punën e organeve të drejtësisë. Gent Strazimiri ka ironizuar me Finon, duke thënë se Prokuroria ishte sjellë keq me socialistët pasi kishte kërkuar të arrestonte Saimir Tahirin. “Këta duhen vrarë, o Bashkim, se janë sjell keq me ju... U bënë ata të kërkojnë t’ju arrestojnë Saimirin ( Tahirin).. Të arrestojnë Saimirin, je në terezi ti?!”, tha Strazimiri. Por për Bashkim Finon qëndrimi i demokratëve po i nxirrte shumë keq në sytë e publikut. “Po bëni ju avokatin e Prokurorisë... Po dilni shumë keq”, tha dje Fino. Edhe pse kërkesat e Prokurorisë ishin për 58 punonjës, socialistët hodhën një ide për t’i shtuar vetëm 4 prokurorë, të cilët do të punonin për dekriminalizimin e politikës, por edhe të administratës së lartë. “Meqë prokurorisë i duhen gjashtë persona për dekriminalizimin, ne t’i vëmë 10 në dispozicion. T’u japim afat 6 muaj, të fillojnë punën prokurorët, të bëjnë qilizmë të plotë, jo vetëm të politikës, por edhe të administratës së lartë”, tha Fino. Por Eduard Halimi e quajti qëndrimin e kolegut të PS- së si një thirrje për t’u bërë gati për qeverinë antimafia që ka propozuar PD.