Rama: Kemi 10 projekte të reja infrastrukturore
Gjiknuri: Investim 420 milionë USD në rrugë dhe ujësjellësa
Kryeministri Rama lajmëroi dje se qeveria ka si prioritete gjatë vitit 2018 dhjetë segmente rrugore që do të financohen nga buxheti i shtetit.
Duke folur para përfaqësuesve të kompanive ndërtuese të infrastrukturës, kreu i qeverisë tha se buxheti i vitit të ardhshëm për infrastrukturën rrugore është 42 për qind më i lartë.
“Ne kemi një buxhet për vitin e ardhshëm 42% më i lartë për financimin e infrastrukturës. Që do të thotë jo pak, edhe pse nuk është i mjaftueshëm për të përfytyruar në një hark kohor të shkurtër ndryshimin që duam. Ama është plotësisht i mjaftueshëm, nëse projektet janë të duhurat, nëse kontratat janë të duhurat, nëse supervizionimi është i duhur e natyrisht, nëse punët janë të duhurat që ne të hedhim hapin e parë”, tha Rama. Financimi i projekteve, sipas kryeministrit, do të bëhet përmes programit “1 miliard për rindërtim”, që, sipas tij, është një program kombëtar i dedikuar për modernizimin dhe transformimin e akseve kryesore kombëtare, por dhe përmes zbatimit të projekteve të nismës së Berlinit. “Ne parashikojmë vetëm përmes këtij injektimi masiv të ardhurash, një rritje të konsiderueshëm punësimi. Sigurisht, pasi të kemi një pamje më të qartë dhe të kemi nënshkruar kontratat, do të jemi në gjendje të themi sa mijëra e mijëra vende të reja pune do të krijohen përmes kësaj ndërhyrjeje direkte apo indirekte. Ne do të bëjmë një politikë shumë agresive për sistemimin e kontratave, në mënyrë që të mos lëmë hapësira të pafundme për spekulime e mashtrime, për sistemimin e supervizionimit, që është një problem themelor në këtë vend, dhe do të jemi me tolerancë zero ndaj të gjithë supervizorëve që do të mashtrojnë në dëm të buxhetit të shtetit”, u shpreh Rama. Përveç nisjes së ndërtimit të rrugëve, Rama tha se projekti do të shtrihet në ndriçimin e tyre, duke akuzuar aleatin e tij në katër vitet e shkuara se nuk donte as rrugët dhe as ndriçimin e tyre.
UJËSJELLËSIT Kryeministri Rama premtoi për një paketë financiare për ndërtimin e ujësjellësve. “Nuk janë vetëm rrugët, por edhe ujësjellësit. Kemi vendosur një fond të konsiderueshëm për ujësjellësit. Jo më larg se dje, bashkë me ministrin kemi diskutuar me KfW- në gjermane, që është donatori më i madh në këtë fushë, për paketën e re të financim- it prej afro 150 milionë euro dhe do të fillojë nga viti i ardhshëm për ujësjellësit”, tha kryeministri. Rama sqaroi edhe qasjen e qeverisë për administrimin e ujit, të puseve private e sidomos të puseve që përdorin kompanitë dhe bizneset.
“Për sa i përket pjesës së përdorimit vetjak apo jetik për një familje që nuk e ka aty shërbimin e ujësjellësit, apo vetjak për një familje që vadit, sepse nuk ka shër- bimin, nuk bëhet fjalë për të vënë asnjë gjë tjetër si barrë, përveç regjistrimit. Na duhet të kemi regjistrin, për shkak të administrimit të integruar të burimeve ujore të Republikës së Shqipërisë. Një zonë e tërë rezidenciale furnizohet me pus, me korrent e ky ujë vlen. Merreni se e keni qyl. Kjo nuk ekziston”, tha Rama. Ministri i Infrastrukturës dhe Energjisë, Damian Gjiknuri, tha se investimet në rrugë do të hapin vende të reja pune. “Mendoj që për sa i përket mbështetjes në infrastrukturën rrugore dhe ujësjellësa, kemi një rritje të dukshme të investimeve në këtë buxhet, dhe po të shikojmë stokun total të investimeve, qoftë ato të huaja apo të vendit, për vitin 2018 shkojnë te një vlerë rreth 420 mln USD ose 43 miliardë lekë, është vlera më e madhe e investimeve e mbledhur së bashku krahasuar me vitet e kaluara”, tha Gjiknuri.