Investimi në Njësinë 9, Veliaj: Do të sjellë rritje të vlerës së pronës
Pranvera do ta gjejë Njësinë 9 me një pamje tërësisht të re, në saje të një projekti të Bashkisë Tiranë, që parashikon transformimin e plotë të kësaj zone. Ndërhyrje parashikohen të bëhen në rrugë dhe sheshe, në bllokun që kufizohet nga bulevardi “Zogu I”, Rruga e Dibrës, rruga “Siri Kodra” dhe rruga “Reshit Petrela” në një sipërfaqe prej 27.4 ha. Ndërsa e cilësoi këtë investim si tejet të rëndësishëm, kryebashkiaku Veliaj tha se transformimi i kësaj zone do t’u shërbejë mijëra banorëve, duke sjellë rritjen e vlerës së pronës së tyre. “Ky projekt me 27.4 ha në 27 rrugë, që parashikon ndërhyrje me themel, pra që nga shtresat nëntokësore, me sinjalistikë, ndriçim etj., duke shtuar edhe disa lulishte, besoj do jetë projekti më transformues që ka parë Njësia 9 në 50 vitet e fundit. U kërkoj banorëve durim, mirëkuptim, teksa do ta kthejmë të gjithë lagjen në kantier, por ama kur të hyjë pranvera, brenda 6- 7 muajsh, do kemi mbaruar dhe kjo do të jetë një zonë, e cila do të shohë vlerën e shtëpisë të rritur, por sigurisht edhe gjallërimin e bizneseve në një zonë shumë të lakmuar të Tiranës”, u shpreh Veliaj, i cili vuri në dukje po ashtu se rikonstruksioni i këtij blloku banimi është një tjetër premtim i mbajtur nga Bashkia e Tiranës, në të cilën nuk është vënë dorë prej vitesh, duke u kthyer në një shqetësim për gjithë komunitetin përreth. Projekti parashikon sistemimin e rrugëve dhe shesheve, me të gjitha elementet e infrastrukturës rrugore dhe urbane, me qëllim përmirësimin e cilësisë së jetës së komunitetit të kësaj zone dhe krijimin e akseseve të lëvizjes me rrugët e tjera të qytetit.