Ndryshon skema e pensionit në fshat, dy variantet e qeverisë

Ministri i Financave, Arben Ahmetaj, deklaroi dje në Komisionin e Ekonomisë se qeveria do të ndryshojë skemën e kontributeve për pensionistët në fshat. Kreu i Financave tha se ndryshimet ligjore do të kryhen për shkak të deficitit që ka krijuar skema e pensioneve në fshat. Shqetësimin për dështimin e skemës së sigurimeve në fshat e ngriti kryetari i Komisionit të Ekonomisë, Erjon Braçe, i cili iu referua të dhënave të raportit të KLSH- së për 2016- n. “Në raportin e 2016 për pensionet thuhet shumë qartë se nëse ka përmirësim të dukshëm në qytet, në fshat ka një rënie dhe një deficit dramatik, që do të thotë që pjesa e reformës që po i adresohet fshatit nuk po funksionon dhe kjo po akumulon deficit”, u shpreh Braçe. Ministri Ahmetaj iu përgjigj se për të adresuar problemin me kontributet në fshat, për dy muaj do të jenë gati ndryshimet e ligjit. “Kontributit në fshat është shumë më i vogël në krahasim me detyrimin e kontributit në qytet. Meqenëse subvencioni nga buxheti i shtetit është shumë më i madh për fshatin sesa është në qytet, nuk ka arritur të tërheqë në skemë aq sa do të donim të tërhiqnim. Deficiti në skemë nga pjesa e fermerit është shumë i madh. Besoj se në 2 muajt që vijnë do të sjellim ndryshime ligjore për mbylljen e problematikës serioze në fshat”, u shpreh Ahmetaj. Me ndryshimet e ligjit, qeveria parashikon dy variante. Ministri i Financave tha se po shikohet mundësia e uljes së pagës minimale, mbi të cilën paguhet kontributi, si dhe ndërgjegjësimin për fermerët që nuk paguajnë kontribute. “Ka disa mënyra. Një nga mënyrat është që pagën minimale, që është bazë e kontributit, përderisa në fshat nuk ka atë dëshirë për t’u paguar, ta ulim dhe ta bëjmë pak më shumë se gjysma e pagës minimale, që baza në fshat të jetë më e ulët. Alternativa tjetër është lajmërimi i çdo pensionisti në fshat ku t’i thuhet se sa do jetë masa e pensionit, nëse është debitor ose nuk kontribon”, u shpreh ministri.