TIFF shfaq 4 filma të Viktor Gjikës, homazh në 80- vjetor
Një homazh në 80- vjetorin e lindjes së regjisorit Viktor Gjika. Tirana International Film Festival- TIFF i ka kushtuar një seksion të veçantë mjeshtrit të kinemasë, duke përfshirë në kalendarin e vet katër nga veprat e tij më të njohura në gjininë e filmit artistik, “I teti në bronz” ( 1970), “Rrugë të bardha” ( 1974), “Njeriu me top” ( 1977) dhe “Në çdo stinë” ( 1980). Filmat në 35 mm po shfaqen prej datës 6 nëntor në kinemanë e Arkivit Qendror Shtetëror të Filmit. Sipas drejtores së AQSHF, Iris Elezi, “Secili prej tyre ka një kontribut të vazhdueshëm dhe nganjëherë kontrovers në kinematografinë e këtij vendi. Puna e Viktor Gjikës, si përcaktuese e zhanrit të filmit artistik dhe kryesisht e panjohur jashtë kufijve Shqipërisë, ende diskutohet nga kritikët e kinemasë, të cilët përpiqen të kuptojnë nocionet komplekse të artit dhe kulturës në Shqipëri gjatë pesëdhjetë viteve të diktaturës. I lindur në qytetin jugor të Korçës, ‘ Parisit të Vogël’ të Shqipërisë, Viktor Gjika u rrit i mrekulluar nga shfaqjet e filmave në kinemanë e qytetit të tij, Majestic ( salla më e madhe në Ballkan në atë kohë)”. Sipas një informacioni të përgatitur nga Elezi dhe Thomas Logoreci, “Gjatë gjithë jetës së tij artistike, Viktor Gjika realizoi pesëmbëdhjetë filma artistikë dhe njëzet e gjashtë dokumentarë. Gjika filloi karrierën e tij si kameraman në filmin e Hysen Hakanit “Debatik” ( 1961) dhe “Detyrë e posaçme” të Kristaq Dhamos ( 1963). Pas realizimit të një sërë dokumentarësh, Gjika u kthye në regji me filmin “Komisari i dritës” ( 1966), duke mbajtur për dy dekada një nga shtyllat e kinemasë komuniste shqiptare. Për shumë shqiptarë, tituj të njohur si, “Horizonte të hapura” ( 1968), “Yjet e netëve të gjata” ( 1972), “Gjeneral gramafoni” ( 1978) janë kthyer në pika referimi kolektive për të rinjtë apo për më të vjetrit, duke anashkaluar kështu ideologjinë ndonjëherë të rëndë të pranishme në këto filma. Në vitin 2012, Projekti i Kinemasë Shqiptare, një iniciativë e themeluar për të sjellë vëmendjen në trashëgiminë e rrezikuar filmike shqiptare, ka punuar me kompaninë amerikane ‘ Colorlab’ për të financuar restaurimin e filmit “Nëntori i dytë” ( 1982) të Viktor Gjikës. Një nga më të kushtueshmit të realizuar në epokën e Kinostudios, ky film është një kronikë e gjerë mbi luftën e shqiptarëve për pavarësi. Premiera e filmit të restauruar pati një shfaqje triumfuese në Tiranë në njëqindvjetorin e ngjarjeve të përshkruara në epikën e Gjikës”.