Tragjedi nga xhelozia, burri masakron me thikë në fyt gruan në sy të fëmijës 8- vjeçar
Tragjedia në Udine të Italisë. Pas vrasjes së gruas 30- vjeçare, autori telefonoi Policinë, “Hajdeni se kam vrarë gruan time”
Tragjedi në një familje shqiptare, që jetonin prej shumë vitesh në Itali.
Burri masakroi me thikë në fyt bashkëshorten e tij, dhe më pas njoftoi Policinë për çka kishte ndodhur. Ngjarja e rëndë ndodhi brenda në banesën e çiftit në Udine, madje në sy të fëmijës së tyre 8 vjeç. I mituri ka përjetuar momente paniku nga skena e përgjakshme, ku viktimë mbeti nëna e tij. Sipas të dhënave nga mediat italiane, të cilat u referohen burimeve të Policisë vendase, krimi i rëndë brenda familjes ka ndodhur dje rreth orës 09: 00, ku viktimë mbeti 30- vjeçarja nga Elbasani Migena Këllezi. Ndërsa autor i krimit të rëndë, është shtetasi Dritan Sulollari, i cili është arrestuar menjëherë pas tragjedisë së ndodhur. “Hajdeni se kam vrarë gruan time”, kanë qenë fjalët e tij në telefon për Policinë italiane. Nga dyshimet e para, thuhet se debatet e shpeshta kishin nisur që kur autori kishte mbetur pa pune. Migena ishte ajo që punonte dhe mbante familjen e prej disa kohësh debatet ishin bërë më të shpeshta deri dje, kur gjithçka përfundoi në tragjedi. Fqinjë të familjes u pohuan karabinierëve italianë se prej disa kohësh kishin dëgjuar zënka në familjen shqiptare. Ata kanë aluduar se veç shkakut të papunësisë së burrit, marrëdhënia e tyre kishte pësuar krisje edhe për shkak të xhelozisë së burrit ndaj gruas. Sulollari mësohet se kishte punuar në sektorin e hotelerisë, por nuk ka të dhëna nëse ai e kishte lënë të punën apo nëse punëdhënësi e ka larguar atë. “Në shtëpi, në kohën e krimit, rreth orës 09: 00, ishte edhe djali i tyre 8- vjeçar. Pasi telefonoi për krimin, burri 37- vjeçar, nuk tentoi të arratisej. Ai ka pritur sa të mbërrinin karabinierët. Kur mbërriti Policia, burri u gjet afër gruas së gjakosur. Ajo ishte 30- vjeçe dhe mes çiftit flitet se kishte debate së fund- mi”, bën të ditur Policia italiane. Sipas Policisë, viktima ishte me nënshtetësi italiane. Ajo jetonte prej disa kohësh në provincën e Gorizias në Udine bashkë me bashkëshortin, Dritan Sulollari, i cili në debat e sipër mori thikën e bukës dhe e masakroi të shoqen, teksa në shtëpi gjendej djali 8- vjeçar i tyre. 37- vjeçari, para se të dërgohej në burg, u shoqërua në spitalin e Gorizia, ku u trajtua për disa lëndime të marra gjatë momentit të krimit. Kjo lë dyshime se ka pasur një përleshje mes çiftit dhe se viktima ka tentuar të vetëmbrohet dhe t’ia largojë thikën nga dora.