Sekuestrohen bilancet financiare të Sotës, Qato 1 orë në Prokurori
"Sota- Tahiri", Prokuroria nis hetimin pasuror ndaj ish- ministrit, verifikim edhe për familjarët dhe krushqit e tij
Prokuroria e Krimeve të Rënda ka sekuestruar ditën e djeshme të gjitha bilancet financiare të firmës private që drejtohet nga biznesmeni Orest Sota dhe i ati i tij.
Organi i akuzës kërkon të ketë sa më shumë detaje në lidhje me aktivitetin e kësaj firme, bilancet financiare dhe transaksionet, për të verifikuar nëse është e mundur që nga kjo firmë të kenë ardhur 863 mijë eurot e sekuestruara në mjetin që drejtohej nga Orest Sota në Elbasan. Deri më tani, biznesmeni 25- vjeçar i qëndron dëshmisë se paratë i kishte për të blerë një sasi të konsiderueshme hekuri te kompania "Kurum", ndërsa kjo e fundit ka rrëzuar versionin e biznesmenit që është në burg. Për këto arsye, pasi sekuestroi librin e shitblerjeve të "Kurum", organi i akuzës kërkon detaje më të plota edhe nga aktivitetet financiare të biznesmenit. Bilancet do të lexohen nga ekspertë të certifikuar kontabël. Burimet thonë se para pak kohësh, disa nga aktivitetet e biznesmenit ishin pranë falimentit, çka ngre dyshime të arsyeshme te prokurorët për burimin e dyshimtë të parave të sekuestruara. Ndërkohë, për patentat e ish- ministrit Tahiri do të merret në pyetje shoferi i tij, si edhe do të analizohen të dhënat e sistemit TIMS, pasi ka dyshime se Tahiri dhe Sota kanë udhëtuar bashkë të paktën tri herë jashtë vendit.
QATO TE KRIMET E RËNDA
Drejtori i Policisë së Elbasanit, Altin Qato, ka qenë ditën e djeshme te Prokuror- ia e Krimeve të Rënda në një takim me prokurorët e çështjes "Sota". Burimet thonë se Qato, në takimin 1- orësh ka diskutuar me prokurorët në lidhje me hetimet e çështjes. Lëvizja vjen rreth tri ditë pasi Prokuroria e Elbasanit shpalli moskompetencë për rastin dhe në një kohë kur ndaj Policisë së atjeshme u hodhën akuza nga opozita për fshehje të ngjarjes. Duke qenë se hetimi shtrihet edhe në Elbasan, Qato do të ketë një rol kyç në hetimet e atjeshme. Burimet thonë se ai do të bashkëpunojë me prokurorët për hetimet e mëtejshme. Deri më tani nuk dihet as burimi i saktë i parave, por as destinacioni i tyre.
HETIM PASUROR FAMILJES SË TAHIRIT
Prokuroria e Krimeve të Rënda ka regjistruar hetimin pasuror ndaj ish- ministrit të Brendshëm Saimir Tahiri, si edhe ndaj të afërmve të tij, pas akuzave për korrupsion dhe trafik droge. Burimet thonë për "Panoramën" se një grup tjetër prokurorësh, i ndryshëm nga ai që heton Habilajt, do të merren me hetimin pasuror të Tahirit dhe familjes së tij. Ata kanë nisur tashmë të dërgojnë shkresa për verifikim llogarish bankare dhe të pasurive të paluajtshme. Burimet konfirmojnë se në sitë të verifikimeve pasurore do të jenë edhe të afërm të ish- ministrit të Brendshëm, Saimir Tahiri. Grupi i punës po bashkëpunon edhe me institucione si ILDKP- ja për pasuritë e deputetit të PS- së. Gjithashtu, do të verifikohen edhe pasuritë e bashkëshortes, familjes së saj, si edhe të personave të tjerë që kanë lidhje krushqie me Tahirin. Prokurorët po verifikojnë edhe me autoritetet portuale në vend, nëse ka ndonjë mjet lundrues në pronësi të ish- ministrit Tahiri, apo familjarëve të tij. Kjo lëvizje është bërë pas zbulimit të patentës për mjet lundrues të Tahirit, në mjetin që drejtohej nga Orest Sota.