Presidenti Meta: Rritja ekonomike 4% nuk garanton mirëqenie
Presidenti Ilir Meta, dje gjatë punimeve të konferencës së Bankës së Shqipërisë deklaroi se rritja ekonomike në 4 për qind është ende e pamjaftueshme për rritjen e mirëqenies së qytetarëve. “Megjithatë, edhe pse trendi rritës i ekonomisë shqiptare pritet të vazhdojë gjatë periudhës 2017- 2019, sfidat që kemi përpara janë të shumta dhe të natyrave të ndryshme. Së dyti, kthimi i ekonomisë në ekuilibër duke nënkuptuar një rritje ekonomike afatmesme dhe afatgjatë prej 3.5- 4% është sërish i pamjaftueshëm për të garantuar një efekt të prekshëm mbi mirëqenien e shtresave të gjëra të shoqërisë, si dhe për të konverguar më shpejt me standardet e vendeve të Bashkimit Europian”, tha Presidenti i Republikës. Në këto kushte, Presidenti Iir Meta veçoi domosdoshmërinë e reformave, sidomos ato për përmirësimin e klimës së biznesit. “Në këtë kuadër, progresi i reformave strukturore është jetik për të mbështetur konvergimin e shpejtë ekonomik dhe institucional me vendet e Bashkimit Europian. Reformat e ndërmarra duhet të ndikojnë në ndryshimin e strukturës së ekonomisë, si dhe në përmirësimin e ambientit ligjor e institucional që përcakton nivelin dhe përbërjen e investimeve në vend. Nevojiten masa të menjëhershme për të përmirësuar seriozisht klimën e biznesit, për të reduktuar informalitetin dhe korrupsionin, si dhe për të promovuar konkurrencën ndërsektoriale. Duhet të ndërmerren politika strukturore që rrisin nivelin e kapitalit njerëzor, përmirësojnë infrastrukturën e zhvillimit dhe promovojnë qeverisjen e shëndetshme të kompanive publike dhe private”, u shpreh Meta.