Veliaj: Bashkëpunim me Pulian për mirëmenaxhimin e Ujësjellësit
Kufizimet në ujin e pijshëm në kryeqytet duket se i kanë orët e numëruara. Krahas nismës për të reduktuar humbjet në rrjet, Bashkia e Tiranës është drejt finalizimit të marrëveshjes së bashkëpunimit për menaxhimin dhe trajtimin e ujit të pijshëm me rajonin e Pulias në Itali. Sipas kryebashkiakut Veliaj, miratimi i projekteve të programit INTERREG, u hap rrugë investimeve të rëndësishme në këtë sektor, për t’i dhënë fund shqetësimit të qytetarëve për furnizimin me ujë të pijshëm. “Lajmi i parë i mirë ka të bëjë me miratimin e projekteve INTERREG, për bashkëpunim midis Ujësjellësit të Pulias dhe Ujësjellësit të Tiranës. Në fakt, qëllon që dy ujësjellësit tanë janë ata që performojnë më mirë në vendet respektive. Ashtu siç po bëjmë me BERZH- in për të marrë kredi për dy investime të rëndësishme, ashtu do të vazhdojmë edhe masterplanin me Ujësjellësin e Pulias, për t’u siguruar që Tirana ka shërbimin më të mirë, edhe në këtë fushë, ashtu siç ka shërbimin më të mirë në fushat e tjera”, tha Veliaj në përfundim të takimit me presidentin e rajonit të Pulias, Michele Emiliano, me të cilin u diskutuan përfitimet e përbashkëta nga projektet e programit INTERREG, Pulia- Shqipëri, me në fokus çështjen e ujit të pijshëm. Kreu i bashkisë nuk kurseu as vlerësimet për performancën e treguar nga UKT në eliminimin e avarive në rrjetin e shpërndarjes së ujit të pijshëm te konsumatorët, si dhe në administrimin e të ardhurave. Në fund të vizitës, presidenti i rajonit të Pulias, Michele Emiliano, u vlerësua nga kryebashkiaku Veliaj me Medaljen e Skënderbeut. Ndërsa shprehu konsideratë për punën e kryebashkiakut Veliaj në krye të Bashkisë, garantoi bashkëpunim të ngushtë në projekte të përbashkëta për zhvillimin e sektorëve të ndryshëm.