Frika nga antikorrupsioni, miliarderët sauditë po shesin investimet
Miliarderë sauditë po nxitojnë për të nxjerrë pasuritë e tyre jashtë mbretërisë, pas arrestimit të më shumë se 200 njerëzve të niveleve më të larta, përfshirë 11 princër, të lidhur me akuza për korrupsion apo mashtrim. Disa nga familjet më të pasura të Arabisë Saudite janë në bisedime me bankat dhe kompanitë e menaxhimit të aseteve për të zhvendosur pasurinë e tyre, në mënyrë që paratë dhe pronat e tyre të mos kapen nga spastrimi antikorrupsion. Prokurori i Përgjithshëm i Arabisë Saudite tha se mbretëria ka thirrur 208 njerëz për t’u marrë në pyetje mbi këtë hetim, duke pasur parasysh se qindra miliarda dollarë janë keqpërdorur përmes përvetësimit dhe korrupsionit në dekadat e fundit. Rreth 1700 llogari bankare janë ngrirë dhe ata që do të gjenden fajtorë për korrupsion rrezikojnë që pronat dhe pasuritë e tyre të sekuestrohen nga qeveria. Zyrtarët arabë nuk kanë dhënë emra për individët që po merren në pyetje, duke thënë se po respektojnë privatësinë e tyre gjatë kësaj faze të procesit. Deri më tani dihet se janë ndaluar të paktën 11 princa dhe 38 ish- ministra të qeverisë me urdhër nga Princi i Kurorës, Mohammed bin Salman. Ka edhe shumë emra të tjerë në listë. Disa sauditë të pasur po shesin investimet në vendet fqinje, për t’i kthyer ato në mjete monetare ose likuide jashtë vendit, sipas rreth 6 burimeve të ndryshme të afërta me marrëveshjet tregtare, që kanë biseduar me “Bloomberg”. Ministria e Informacionit e Arabisë Saudite deklaroi se qeveria do të sekuestrojë çdo pasuri apo pronë lidhur me korrupsionin e supozuar.