Arrestohet gjyqtari i Apelit, zbulohen SMS- të për ryshfetin 20 mijë euro
Policia gjeti në dhomën e gjumit 174,810 euro, 10,149,000 lekë e 1000 USD. Miri: Një pjesë janë të një miku, pjesa tjetër kursime
Gjyqtari i Apelit të Tiranës, Shkëlqim Miri, u arrestua dje në orën 2 të mëngjesit, disa orë pasi në banesën e tij ishin sekuestruar një shumë e konsiderueshme parash, euro, lekë e dollarë.
Kontrolli në banesën e tij u krye me një vendim të Gjykatës së Krimeve të Rënda, që kishte pranuar kërkesën e organit të akuzës që po e hetonte Mirin prej afro një viti. Policia e Shtetit njoftoi dje se ndalimi i gjyqtarit 46- vjeçar është kryer në zbatim të urdhrit të Prokurorisë për Krime të Rënda, në funksion të një procedimi penal proaktiv të këtij viti. Burimet thanë se ai akuzohet për korrupsion, pasi dyshohet se ka marrë 20 mijë euro nga familjarët e një ish- të dënuari për vrasje, akuza e të cilit ishte kualifikuar nga Shkalla e Parë dhe ishte apeluar nga Prokuroria. Në mënyrë që vendimi të mos ndryshonte në Gjykatën e Apelit, të afërmit e të dënuarit kishin ndërhyrë përmes kushëririt të gjyqtarit. Përmes shtetasit Kujtim Miri, i cili u arrestua mbrëmjen e djeshme, ndërmjetësues të familjarëve të të dënuarit, ish- anëtari i KLD, Shkëlqim Miri, ka lehtësuar dënimin, kundrejt shpërblimit financiar. Gjatë kontrollit të banesës së tij, u gjetën dhe u sekuestruan një sasi prej rreth 33 milionë lekësh të rinj. I pyetur në Policinë e Tiranës për prejardhjen e parave, ai ka deklaruar se vetëm 3 milionë lekë të rinj janë kursimet e tij, ndërsa pjesa tjetër janë të një të afërmi që do të blinte një pronë në Tiranë.
OPERACIONI Policia tha dje se është ndaluar gjyqtari Shkëlqim Miri, pasi dyshohet se favorizoi një vendim penal në këmbim të vlerave monetare. Ndalimi i tij është bërë nga oficerët e Sektorit për Hetimin e Korrupsionin në Drejtorinë për Hetimin e Krimit Ekonomik e Financiar, në bashkëpunim dhe nën drejtimin e Prokurorisë së Krimeve të Rënda. Operacioni për arrestimin e gjyqtarit u kodua “Një vrasje e dytë”. “Ndalimi i tij u krye në funksion të procedimit penal proaktiv të vitit 2017, për veprat penale të ‘ Korrupsionit aktiv të gjyqtarit, prokurorit dhe funksionarëve të tjerë të drejtësisë’ e ‘ Korrupsionit pasiv të gjyqtarëve, prokurorëve dhe funksionarëve të tjerë të organeve të drejtësisë’. Grupi hetimor kishte krijuar dyshime të arsyeshme të bazuara në prova, për favorizim e një të dënuari për veprën penale të vrasjes me dashje dhe armëmbajtje pa leje, kundrejt kërkimit dhe marrjes së përfitimeve monetare të paligjshme”, tha dje zyrtarisht Policia e Shtetit. Të njëjtat burime thanë se në këtë operacion, në bazë të dyshimeve të bazuara në provat e siguruara gjatë hetimit proaktiv, ka rezultuar dhe janë dokumentuar një sërë veprimesh dhe lidhjesh të dyshimta që për marrjen e këtij vendimi, gjyqtari Miri ka marrë një sasi të konsiderueshme parash. Nga kontrolli i banesës së Shkëlqim Mirit, me vendim të Gjykatës së Krimeve të Rën- da, u gjetën dhe u sekuestruan rreth 33 milionë lekë të rinj. “174,810 euro, 10,149,000 lekë dhe 1000 dollarë”, tha Policia. Paratë u gjetën në një çantë në dhomën e gjumit.
HETIMI Hetimet për Shkëlqim Mirin mësohet se kanë nisur në janar të këtij viti, pas informacioneve se gjykatat shqiptare po i jepnin lirinë Gentian Dodës, ish- i dënuar në mungesë për vrasje. Burime nga Prokuroria thanë se pjesë e aferës korruptive janë edhe katër shtetas të tjerë, që nga ndërmjetësi, deri te një i afërt i ish- të dënuarit Doda, i cili ka fituar në qershor të këtij viti. Prokuroria ka në dorë tri prova të forta që e implikojnë gjyqtarin në aferat korruptive. Janë pamjet filmike të një kamere sigurie në një lokal në Fushë- Krujë, në muajin maj 2017, ku shfaqet ndërmjetësuesi duke marrë paratë. Bëhet fjalë për 20 mijë euro. Prova e dytë janë mesazhet përmes aplikacionit “WhatsApp”. Pas dorëzimit të parave në Fushë- Krujë, një i dyshuar tjetër njofton më pas të dënuarin Doda përmes “WhatsApp”- it se për dy javë çështja sistemohej. Prokuroria e Krimeve të Rënda ka improvizuar sekuestrimin e përkohshëm të një celulari nga një postbllok policie, për të cilin i është komunikuar përdoruesit se dyshonin që aparati ishte i vjedhur e për këtë arsye duhet të kryheshin disa verifikime. Ndërsa ekziston edhe një provë e tretë, që është edhe më e rëndësishmja, tabulatet telefonike dhe bisedat që vetë gjyqtari ka bërë me kushëririn e tij, që ishte ndërmjetësuesi me të afërmit e Gentian Dodës, në lidhje me këtë çështje.