Atentati në Ekuador për trafiqe droge, zbulohet emri i shqiptarit

EKUADOR- Identifikohet shqiptari që iu bë atentat dy ditë më parë në Ekuador. Ai është shtetasi Remzi Azemi, shtetas nga Kosova. Mediat lokale atje kanë zbuluar të dhëna të tjera sa i takon ngjarjes, që ka pasur jo pak jehonë në vendin tonë. Dyshohet se shqiptari nga Kosova është person i përfshirë në një organizatë që merret me trafikun e kokainës. Shefi i zyrës së Antikrimit, German Cevallos, thotë se atentati i ndodhur orët e vona të së martës ndaj Remzi Azemit, në qytetin Guayaquil, mendohet se ka lidhje me trafikun ndërkombëtar të drogës nga ky vend i Amerikës Latine drejt Europës. Azemi po udhëtonte me një automjet të blinduar në momentin kur u qëllua me armë zjarri nga dy persona që po lëviznin me një motor. Ata qëlluan në drejtim të tij katër herë, ndërkohë që shqiptari ndodhej në shoqërinë e bashkëshortes së tij me origjinë shqiptare, si dhe vajzës 3 vjeçe, që nuk kanë marrë dëmtime. Sipas Policisë, atentati ndodhi në çastin kur Azemi kishte ndaluar automjetin, teksa bashkëshortja e tij po tymoste një cigare. Ajo kishte hapur përgjysmë xhamin e automjetit dhe pikërisht kjo hapësirë, është shfrytëzuar nga atentatorët për të qëlluar në drejtim të tij duke e lënë të plagosur. Kjo lë të nënkuptohet se autorët e sulmit me armë ishin në dijeni se shqiptari kishte në përdorim një automjet të blinduar. Sipas kreut të Antikrimit, Cevallos, i plagosuri nuk është emër i panjohur për autoritetet atje. Kjo, pasi Azemi ka qenë i ndaluar në vitin 2014 gjatë operacionit të koduar me emrin “Ballkan”. Gjatë atij operacioni, u arrestuan në total 11 persona, mes së cilëve shqiptarë, kosovarë dhe ekuadorianë, pjesë e një organizate që e kishte shtrirë aktivitetin e narkotrafikut në Ekuador, Peru e deri në Spanjë e Europë. Dyshime hidhen se Azemi u lirua, pasi kishte pranuar të bashkëpunonte me autoritetet amerikane të Antidrogës. Gjithashtu, ai kishte lidhje edhe me shqiptarin Ilir Hidri, 39– vjeçarin e vrarë më 30 maj të këtij viti po në Guayaquil, ngjarje që dyshohet se ka lidhje, gjithashtu me pazaret e drogës. Shefi i Antikrimit ka bërë të ditur se Azemi jetonte në një shtëpi me qira në pronësi të Hidrit. Remzi Azemi ndodhet në spital, jashtë rrezikut për jetën, ndërsa autoritetet po punojnë për të identifikuar dhe kapur dy atentatorët.