Fiton Suedia, dridhet Italia

Kritika pa fund, Ventura mund të shkarkohet edhe po u kualifikua

Italia ka komplikuar gjithçka sa i përket ëndrrës për të shkuar në Botërorin e Rusisë.

Skuadra e drejtuar nga Ventura pësoi një humbje të hidhur 1- 0 nga Suedia në fushën e kësaj të fundit dhe tani vë seriozisht në pikëpyetje pjesëmarrjen në kompeticionin më të rëndësishëm në planet. Goli i Jakob Johanson në minutën e 61- të vulosi fatet e ndeshjes së parë mes këtyre dy skuadrave dhe futi në stres të kaltrit që në ndeshjen e kthimit duhet të luajnë me llogari. Po, sepse duhet të fitojnë patjetër 1- 0 për ta çuar minimalisht ndeshjen në kthesë, dhe u duhen më shumë se dy gola, por mundësisht pa pësuar, që të kualifikohen direkt.

NDESHJA Italia tregoi sërish limite në një kundërshtar tmerrësisht mesatar sa u përket cilësive në fushën e lojës. Skuadra e Venturës e ka të vështirë të gjejë portën dhe shtylla e Darmian në minutën e 70- të nuk justifikon dot zhgënjimin që ngjallën të kaltrit. Ekipi italian megjithëse kishte yje si Verrati, Kandreva, dhe Insinje në fushë, nuk arriti për asnjë moment të ishte i paparashikueshëm dhe efikas në lojë. Mbrojtja, një nga pikat më të forta, u kap disa herë e papërgatitur, ndërsa mesfusha disi e plakur dhe pa grintën e zakonshme. Sikur të mos mjaftonte kjo, Verrati u ndëshkua edhe me një karton të verdhë të panevojshëm, duke humbur ndeshjen e kthimit që do të luhet të hënën në “San Siro”, më datë 13 nëntor. KRITIKA PA MËSHIRË Ende pa përfunduar ndeshja, tifozët shpërthejnë në rrjetet sociale me kritika të forta për skuadrën dhe për trajnerin e saj. Niveli i lojës dhe dëshira e lojtarëve për ta fituar këtë ndeshje e për t’u sjellë si burra në fushë, ishin detajet që u mëshoheshin më tepër nga fansat. Sipas asaj që raportonte media italiane dje në mbrëmje, trajneri Ventura rrezikon të shkarkohet edhe nëse skuadra e tij bën përmbysjen e duhur dhe arrin të kualifikohet për në Botërorin e Rusisë.