Negociatat, palët pranë një pakti të ri për detin dhe Ligjin e Luftës
Dakordësi për ngritjen e varrezave greke në Shqipëri, por dhe monumente kujtese për çamët e vrarë në territorin grek
Qeveria shqiptare dhe ajo greke do të duhet të ulen për një marrëveshje të re për detin.
Mësohet se grupet teknike të kryesuara nga dy ministrat e Jashtëm, Bushati dhe Kotzias, kanë rënë dakord që të rishikohet metodika e përcaktimit të kufirit detar mes Shqipërisë dhe Greqisë. Ndryshe nga marrëveshja e vitit 2009, e cila u rrëzua nga Gjykata Kushtetuese e Shqipërisë, Greqia duket se ka pranuar vijën mesore, që do ta ndante drejt distancën mes brigjeve të dy vendeve në Kanalin e Korfuzit. Dhe kjo vijë mesore, për të nxjerrë baraslargësinë, në bazë të së drejtës detare ndërkombëtare, merret si bazë si një vijë e drejtë që nis nga kepet më ekstreme të brigjeve tokësore, dhe jo nga masa shkëmbore apo ishuj që mund të gjenden kudo në mes të detit ndërmjet dy vendeve, sikurse u bë në marrëveshjen e parë. Ky ka qenë qëndrimi i ekspertëve të marrëveshjeve detare, e cila u debatua shumë në ambientin politik shqiptar pas nënshkrimit të saj nga dy kryeministrat e kohës. Por duket se dhe Ligji i Luftës ka gjetur zgjidhje. Mësohet se palët kanë sjellë me vete edhe ekspertizën ndërkombëtare, ndërsa pala greke ka hulumtuar me Presidencën për mënyrën ligjore të heqjes së ligjit në fjalë.
Për këtë temë ka një shqyrtim të Presidencës greke, e cila ka vlerësuar se heqja e ligjit mund t’i bashkëngjitet traktatit të ri të miqësisë, i cili do të formulohet në muajt në vazhdim. Por ende nuk dihet nëse është rënë dakord që në fund do të jetë Parlamenti grek ai që do ta abrogojë ose jo këtë ligj, që qëndron mes Greqisë dhe Shqipërisë për 77 vjet. Por pushimi i këtij ligji, do t’i jepte të drejtë shqiptarëve të Greqisë, popullsisë çame e larguar me forcë nga vendi fqinj, në mos për t’u kthyer në pronat e tyre ( të shtetëzuara apo privatizuara nga shteti grek dhe qytetarë të tij), të paktën të marrin një dëmshpërblim të drejtë për to. Kjo dakordësi pritet të jetë shkëmbyer me të drejta edhe më të mëdha të minoritetit grek në Shqipëri. Kur flasim për Ligjin e Luftës dhe rifitimit të të drejtave të çamëve në Greqi, kemi të bëjmë dhe me krijimin e hapësirave më të mëdha edhe për nderimin e të rënëve në të dyja anët e kufirit. Mësohet se ministri Bushati ka rënë dakord me homologun Kotzias për ngritjen e varrezave të ushtarëve grekë, të rënë në territorin shqiptar gjatë luftës italo- greke. Pritet që të ngrihen memorialë dhe për të rënët çamë në Tesproti në shenjë respekti reciprok dhe kjo do të përbënte një korrigjim të fortë të qëndrimeve të deritanishme greke ndaj popullsisë çame.
Për të forcuar miqësinë mes dy vendeve, në prag të nënshkrimit të një pakti të ri miqësie, palët bashkëbiseduese kanë rënë dakord dhe për rishikimin e teksteve historike për të mos krijuar ndjenja armiqësie apo shfaqje të nacionalitetit të sëmurë. Bisedimet mësohet se kanë gjetur zgjidhje dhe për njohjen e patentave shqiptare në Greqi.