Veliaj në Serbi fton kompanitë e huaja: Tirana, qyteti ideal per investime
Nga taksat e ulëta, kushtet atmosferike deri te talenti i njerëzve që duan të punojnë janë prej avantazheve që ofron Tirana. Ndërsa e cilësoi qytetin ideal të investimeve në Ballkan, kryebashkiaku Erion Veliaj ftoi kompanitë e huaja që të kthejnë sytë nga kryeqyteti shqiptar dhe të shfrytëzojnë potencialet e tij. “Besoj se Tirana me mundësitë e reja që po ofron, me taksat e ulëta, ndoshta më të ulëtat sot në rajon nga secili prej kryeqyteteve të pranishëm, është vendi ideal për të investuar. Mesazhi që japim në këtë forum ballkanik të investimeve është që sot Tirana listohet për të gjitha këto arsye, duke nisur nga moti, te mosha, te taksat dhe te talenti i njerëzve që duan të punojnë, si vendi ideal i investimeve në Ballkan”, u shpreh Veliaj gjatë forumit “Ditët e Investimeve në Beograd”, në të cilin ishte i pranishëm me ftesë të kryebashkiakut të Beogradit, Sinisa Mali. Kreu i Bashkisë theksoi më tej se Tirana është e hapur për të mirëpritur investime në zonën e re ekonomike të kryeqytetit, ku bizneset do të kenë mjaft lehtësira, duke shmangur edhe burokracitë e panevojshme. “Po përgatisim të bëjmë një aplikim në qeverinë shqiptare për të na dhënë statusin e zonës ekonomike, e cila do të na bënte konkurrues bashkë me kryeqytetet e tjera, të cilat i kanë krijuar këto hapësira, për të ftuar biznese, të cilat nuk duan kokëçarjet e negociatave me dhjetëra pronarë apo pretendues të pronës, por duan që në një pronë tashmë të sqaruar nga qeveria apo Bashkia, të vendosin menjëherë një kapanon ku mund të kryejnë më pas biznesin e tyre dhe të fillojnë menjëherë prodhimin”, deklaroi ai. Veliaj u ndal edhe në projektet e finalizuara dhe ato në proces, përmes të cilave është arritur që treguesit e turizmit të pësojnë rritje në pak vite. “Me rritjen e vlerës së pronës, që sot kemi pasur interes nga shumë prej kompanive që duan të vijnë, të blejnë dhe të investojnë një pronë në Tiranë apo të fusin industrinë e hotelerisë, ku Tirana ka pasur një rritje të turizmit me 2.5 herë në vitet e fundit. Forumi “Ditët e Investimeve në Beograd”, i cili po mbahet në kryeqytetin e Serbisë, ka bërë bashkë përfaqësues të trupit diplomatik, ministrive, investitorëve, përfaqësues të institucioneve ndërkombëtare financiare, banka e kompani të huaja dhe vendase, përfaqësues të fondeve, dhomave të tregtisë, nga Europa Juglindore, Qendrore dhe Jugperëndimore, Rusia, Kina dhe Lindja e Mesme.